А1 збіраецца падарваць манаполію «Яндэкса» на рынку беларускага таксі
Як стала вядома «Нашай Ніве», у 2025 годзе можна чакаць выхаду на рынак нерэгулярных пасажырскіх перавозак новага агрэгатара, над якім працуюць у кампаніі A1. Гэта не першая спроба тэлекамунікацыйнага правайдара заняцца гэтым бізнэсам.
Служба таксі для А1 — гэта не нешта абсалютна новае, а рэінкарнацыя старой ідэі з улікам рынкавай кан'юнктуры: пры канцы 2013-га тады яшчэ velcom замахваўся на агрэгатар транспартных паслуг, блізкі па функцыянале да звыклых сёння Uber, Bolt ці Яндэкс Go.
Праз дадатак «Таксі твайго горада» можна было выклікаць таксі са спісу гарадскіх службаў. Існавала дастаўка прадуктаў, трансфер да аэрапорта, буксіроўка, магчымасць ацэнак якасці.
Недакручанасць некаторых тэхнічных рашэнняў і павольнасць маркетынгу не дазволіла дадатку хутка стаць папулярным, а прыход Uber у Беларусь у 2015-м не пакінуў часу на выпраўленне памылак. Стартап памёр.
Але за гэтыя гады шмат што здарылася. Гарадскія таксапаркі і таксісты «ад борту» амаль вымерлі, а заходнія кампаніі пакінулі Беларусь.
Станам на 2024 год каля 90% рынку пасажырскага таксі Беларусі падмяты «Яндэксам», які хварэе ўсімі ўласцівымі манапалісту хваробамі: высокія тарыфы для пасажыраў, непрывабныя ўмовы работы для кіроўцаў, перыядычны дэфіцыт паслуг.
Пагоршыла цэнавую сітуацыю на рынку і дзяржава, якая бюракратызавала ў 2024-м доступ кампаній-перавозчыкаў і індывідуальных кіроўцаў да рынку.
Але нягледзячы на гэта, цяпер зручны час для таго, каб паспрабаваць адкусіць кавалак рынку. Манаполія, калі яна не дзяржаўная, заўсёды знаходзіцца ва ўразлівым да канкурэнтаў становішчы.
А1 можа валодаць і тэхнічнымі, і маральна-этычнымі канкурэнтнымі перавагамі над расійскай кампаніяй. Застаецца пытанне з фінансавай матывацыяй кампаній-перавозчыкаў, каб перацягнуць іх на свой бок.
У 2020-м аб'ём беларускага рынку нерэгулярных пасажырскіх перавозак ацэньваўся ў $394 мільёны.
А1 — правайдар тэлекамунікацыйных, інфармацыйна-камунікацыйных і кантэнт-паслуг у Беларусі. У асноўным гэта доступ да інтэрнэту, мабільнай сувязі, дата-цэнтры, лічбавае тэлебачанне.
Кампанія пачала дзейнасць у 1999 годзе. З 2007 уваходзіць у склад міжнароднай A1 Group (Аўстрыя), якая кантралюецца транснацыянальным холдынгам América Móvil (Мексіка). Да 2019 года кампанія ў Беларусі дзейнічала пад брэндам Velcom. Абанентамі іх мабільнай сувязі, як дэкларуе А1, з'яўляюцца больш за 4,8 мільёна чалавек.
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»30
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары