A1 źbirajecca padarvać manapoliju «Jandeksa» na rynku biełaruskaha taksi
Jak stała viadoma «Našaj Nivie», u 2025 hodzie možna čakać vychadu na rynak nierehularnych pasažyrskich pieravozak novaha ahrehatara, nad jakim pracujuć u kampanii A1. Heta nie pieršaja sproba telekamunikacyjnaha pravajdara zaniacca hetym biznesam.
Słužba taksi dla A1 — heta nie niešta absalutna novaje, a reinkarnacyja staroj idei z ulikam rynkavaj kanjunktury: pry kancy 2013-ha tady jašče velcom zamachvaŭsia na ahrehatar transpartnych pasłuh, blizki pa funkcyjanale da zvykłych siońnia Uber, Bolt ci Jandeks Go.
Praz dadatak «Taksi tvajho horada» možna było vyklikać taksi sa śpisu haradskich słužbaŭ. Isnavała dastaŭka praduktaŭ, tranśfier da aeraporta, buksiroŭka, mahčymaść acenak jakaści.
Niedakručanaść niekatorych techničnych rašeńniaŭ i pavolnaść markietynhu nie dazvoliła dadatku chutka stać papularnym, a prychod Uber u Biełaruś u 2015-m nie pakinuŭ času na vypraŭleńnie pamyłak. Startap pamior.
Ale za hetyja hady šmat što zdaryłasia. Haradskija taksaparki i taksisty «ad bortu» amal vymierli, a zachodnija kampanii pakinuli Biełaruś.
Stanam na 2024 hod kala 90% rynku pasažyrskaha taksi Biełarusi padmiaty «Jandeksam», jaki chvareje ŭsimi ŭłaścivymi manapalistu chvarobami: vysokija taryfy dla pasažyraŭ, niepryvabnyja ŭmovy raboty dla kiroŭcaŭ, pieryjadyčny deficyt pasłuh.
Pahoršyła cenavuju situacyju na rynku i dziaržava, jakaja biurakratyzavała ŭ 2024-m dostup kampanij-pieravozčykaŭ i indyvidualnych kiroŭcaŭ da rynku.
Ale niahledziačy na heta, ciapier zručny čas dla taho, kab pasprabavać adkusić kavałak rynku. Manapolija, kali jana nie dziaržaŭnaja, zaŭsiody znachodzicca va ŭraźlivym da kankurentaŭ stanoviščy.
A1 moža vałodać i techničnymi, i maralna-etyčnymi kankurentnymi pieravahami nad rasijskaj kampanijaj. Zastajecca pytańnie ź finansavaj matyvacyjaj kampanij-pieravozčykaŭ, kab pieraciahnuć ich na svoj bok.
U 2020-m abjom biełaruskaha rynku nierehularnych pasažyrskich pieravozak aceńvaŭsia ŭ $394 miljony.
A1 — pravajdar telekamunikacyjnych, infarmacyjna-kamunikacyjnych i kantent-pasłuh u Biełarusi. U asnoŭnym heta dostup da internetu, mabilnaj suviazi, data-centry, ličbavaje telebačańnie.
Kampanija pačała dziejnaść u 1999 hodzie. Z 2007 uvachodzić u skład mižnarodnaj A1 Group (Aŭstryja), jakaja kantralujecca transnacyjanalnym chołdynham América Móvil (Mieksika). Da 2019 hoda kampanija ŭ Biełarusi dziejničała pad brendam Velcom. Abanientami ich mabilnaj suviazi, jak dekłaruje A1, źjaŭlajucca bolš za 4,8 miljona čałaviek.
Ciapier čytajuć
Zatrymali čarhovaha čałavieka hoda Viciebščyny, deputata Viciebskaha abłsavieta Dźmitryja Kalahu5
Zatrymali čarhovaha čałavieka hoda Viciebščyny, deputata Viciebskaha abłsavieta Dźmitryja Kalahu
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich1818
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich18
«Da lejtenanta pryjechała maładaja žonka, pabačyła, što adbyvajecca ŭ zonie, i zastreliłasia». Vyjšła zaklučnaja častka ŭspaminaŭ Ryhora Biarozkina pra HUŁAH i saviecki Minsk1818
Kamientary