З 10 лістапада беларусы будуць заязджаць у Еўрасаюз па новых правілах. Што зменіцца?
Праз два месяцы Еўрасаюз плануе запусціць аўтаматычную сістэму рэгістрацыі ўезду і выезду на знешніх межах Шэнгенскай зоны. Адно з галоўных новаўвядзенняў — сістэма Entry Exit System (EES). Пасля таго, як яна запрацуе, штампы ў пашпарты ставіцца больш не будуць.
Новая сістэма кантролю ўезду/выезду (EES) павінна пачаць працу на ўсіх знешніх межах ЕС з 10 лістапада 2024 года. Яе ўкараненне ўжо некалькі разоў адкладалася. Аб стварэнні EES дамовіліся яшчэ напрыканцы 2017 года. Першапачаткова планавалася запусціць яе ў маі 2022 года, затым тэрмін пераносілі на май 2023-га і канец 2023 года.
Як гэта працуе?
Entry Exit System уяўляе сабой аўтаматызаваную сістэму рэгістрацыі грамадзян дзяржаў, якія не ўваходзяць у Еўрасаюз і прыбываюць з кароткатэрміновымі візітамі.
Сістэма прызначана для замены традыцыйнай штампоўкі пашпартоў.
Пры кожным перасячэнні знешняй мяжы Шэнгенскай зоны падарожніку трэба будзе сканаваць пашпарт у спецыяльным электронным тэрмінале самаабслугоўвання. Апроч пашпарта, тэрмінал будзе сканаваць твар чалавека і адбіткі пальцаў.
Сістэма будзе рэгістраваць дату і месца ўезду/выезду, прозвішча, імя вандроўніка і яго біяметрычныя даныя. Даныя ў сістэме будуць захоўвацца на працягу трох гадоў ад даты апошняй паездкі.
Новыя правілы не будуць распаўсюджвацца на ўладальнікаў ДНЖ у адной з краін Еўрасаюза, а таксама трымальнікаў доўгатэрміновых віз (тып D).
Дзе будзе дзейнічаць новая сістэма?
EES будзе дзейнічаць ва ўсіх краінах ЕС, акрамя Кіпра і Ірландыі. Таксама сістэма будзе працаваць і ў чатырох краінах, якія не з'яўляюцца ўдзельнікамі Еўрасаюза, але ўваходзяць у Шэнгенскую зону: Ісландыя, Ліхтэнштэйн, Нарвегія і Швейцарыя.
Новыя правілы ўводзяцца з мэтай узмацніць бяспеку на межах. Таксама сістэма аўтаматычна будзе выяўляць тых, хто прабыў у Шэнгене даўжэй 90 або 180 дзён (раней гэта даводзілася рабіць пагранічнікам).
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары