Міністр абароны Ізраіля заявіў, што ў гэтыя дні Іран здзейсніць беспрэцэдэнтны па маштабу напад на Ізраіль
«Мы зафіксавалі падрыхтоўку Ірана да атакі. Такога мы яшчэ не бачылі», — заявіў міністр абароны Ізраіля Ёаў Галант. На фоне гэтага ЗША сцягнулі ў рэгіён рэкордную колькасць войскаў і сакрэтную атамную падлодку.
Падчас нядзельных тэлефонных перамоваў паміж міністрамі абароны ЗША і Ізраіля Ёаў Галант праінфармаваў Лойда Осціна, што Іран рыхтуе беспрэцэдэнтны па маштабу напад на Ізраіль і што падобнага за гісторыю назіранняў яшчэ ніколі не адбывалася, паведамляе амерыканскі партал Axios са спасылкай на крыніцы, знаёмыя са зместам размовы.
Па словах Галанта, сумесная поўнамаштабная атака Ірана, «Хезбалы» і іншых праіранскіх груповак можа адбыцца ў наступныя некалькі дзён. А па інфармацыі крыніц агенцтва CNN і тэлеканала Fox News, напад можа адбыцца да гэтага чацвярга (дзень, калі Ізраіль і ХАМАС плануюць канчаткова падпісаць умову пра перамір'е і вызваленне закладнікаў), альбо ўжо сёння ноччу.
У той жа час ізраільскі 12-ы канал адзначае, што адразу пасля размовы з Галантам міністр абароны ЗША Лойд Осцін аддаў тэрміновы загад аб адпраўцы на Блізкі Ўсход атамнай падводнай лодкі USS Georgia, якая можа несці 154 крылатыя ракеты Tomahawk, у тым ліку з ядзернымі зарадамі. Рашэнне аб раскрыцці інфармацыі аб перасоўваннях дадзенай субмарыны з'яўляецца незвычайным крокам, бо месцазнаходжанне такіх падлодак заўсёды трымаецца ў сакрэце.
Акрамя таго, ЗША экстранна накіравалі на дапамогу Ізраілю два авіяносцы «Авраам Лінкальн» і «Тэадор Рузвельт», якія суправаджаюцца дзясяткамі баявых караблёў прыкрыцця і нясуць сумарна каля 200 знішчальнікаў і верталётаў, уключаючы найноўшыя стэлс-знішчальнікі F-35.
Разам з гэтым ля берагоў Ізраіля і Ірана размясціліся дэсантныя караблі ЗША з тысячамі марскіх пехацінцаў і спецназаўцаў на борце на выпадак поўнамаштабнай вайны ў рэгіёне.
Нагадаем, што напружанасць паміж Ізраілем і Іранам рэзка ўзрасла ў канцы ліпеня пасля забойства лідара тэрарыстычнай групоўкі ХАМАС Ісмаіла Ханіі, якое адбылося наўпрост ва ўрадавым квартале іранскай сталіцы Тэгеран. Адказнасць Іран усклаў на Ізраіль, а той не пацвердзіў і не абверг сваё дачыненне.
Апошнія тыдні Іран актыўна заяўляў, што «жорстка і хутка» адпомсціць Ізраілю за забіццё Ханіі. Ізраіль асцерагаецца, што помста можа ўяўляць прамы ракетны напад Ірана сумесна з уварваннем на ізраільскую тэрыторыю «Хезбалы» і іншых праіранскіх груповак.
Ізраіль паабяцаў, што калі яго выведка палічыць такі сцэнар непазбежным, то атакуе Іран першым.
Каментары
Тут другое. Іран, як і расея, з'яўляецца саюзнікам гэтай балшавісткай хунты, якая захапіла ўладу ў ЗША. А Осьцін раскрыў сакрэтную інфармацыю пра атамную падлодку. (каб гэта зрабіў Трамп, то ужо быў бы вой!). Зараз гэты Осьцін зноўку ціхенька схаваецца на бальнічны, як ён тое ўжо рабіў.