Польскі Кангрэс жанчын звярнуўся да палітыкаў пасля смерці згвалтаванай беларускі
Яны заклікаюць уключыцца ў барацьбу з гвалтам над жанчынамі і вярнуць ім правы на прыняцце рашэнняў адносна ўласнага цела і абарону сваёй цэласнасці, піша Reform.by.
«Мы не проста ўзрушаныя смерцю гэтай дзяўчыны, мы поўныя гневу і абурэння! І справа не толькі ў гэтым асобным выпадку, справа ў яе жудасных пакутах і смерці. Мы схіляем перад ёй галаву, але ў той жа час заклікаем: яна — адна з тысяч ахвяр», — гаворыцца ў тэксце, апублікаваным Кангрэсам у дзень смерці Лізы, 1 сакавіка.
Дзяўчат і жанчын пастаянна гвалтуюць, на вайне і ў мірны час, на вуліцах і ва ўласных дамах, дэгенераты і «прыстойныя мужчыны», знаёмыя і незнаёмыя. Закон не рэагуе, паліцыя марудзіць (за выключэннем экстраных выпадкаў), палітыкі з цяжкасцю або зусім не згаджаюцца эфектыўна змагацца з гвалтам у дачыненні да жанчын.
«Стамбульская Канвенцыя аб прадухіленні гвалту ў дачыненні да жанчын і дзяцей ужо шмат гадоў знаходзіцца ў палітычнай замарозцы. Прэзідэнт Дуда заявіў, што яе наогул не варта ўжываць. Гэта заахвочвае злачынцаў. Па нейкай прычыне гвалт у адносінах да жанчын і дзяцей сустракаецца ў Польшчы з крайняй абыякавасцю з боку палітыкаў і паліцыі. Але хопіць! Мы павінны зрабіць усё, каб мабілізаваць усе сродкі (палітычныя, Юрыдычныя, адукацыйныя) для спынення гэтага гвалту. Каб ні з адной жанчынай больш не звярталіся як з аб'ектам, каб яна не станавілася ахвярай згвалтавання, катаванняў і пакут», — заяўляюць прадстаўніцы арганізацыі.
«Спадары палітыкі! Уключыцеся, нарэшце, у барацьбу з гвалтам над жанчынамі, вярніце ім адабраныя пісаўскімі [партыя «Закон і справядлівасць»] фундаменталістамі аўтаномныя правы на прыняцце рашэнняў наконт уласнага цела і абарону сваёй цэласнасці», — заклікаюць яны.
***
Раніцай 25 лютага вартаўнік аднаго з дамоў на вуліцы Журавя пабачыў аголеную дзяўчыну без прытомнасці. Яна ляжала ў варотах дома і не падавала прыкмет жыцця. Камера назірання зафіксавала, як мужчына ў балаклаве падбег да яе ззаду, прыставіў нож да шыі і заштурхнуў у браму.
Праз некалькі гадзін пасля інцыдэнту быў затрыманы жыхар Варшавы, 23-гадовы Дарыян С., калі пакідаў арандаванае памяшканне ў раёне Макатуў, дзе жыў са сваёй партнёркай. Выйсці на яго след дапамаглі камеры відэаназірання і вышуковыя сабакі. Мужчыну выстаўленыя абвінавачванні ў замаху на забойства жанчыны на глебе рабавання і сэксуальнага гвалту. Яму пагражае пажыццёвае зняволенне. На дадзены момант ён заключаны пад варту на тры месяцы. Сёння стала вядома, што Лізу пахаваюць у Варшаве. Дата пакуль невядомая.
Цяпер чытаюць
Раман Пратасевіч асвоіў прафесію бармена і адшукаў працу. Вось у якім бары можна яго знайсці9
Каментары