24 гады таму, летам 2000 года, на дарозе паміж Домам гандлю і касцёлам у Шчучыне быў знойдзены труп мужчыны з прыкметамі гвалтоўнай смерці. Расследаванне ні да чаго не прывяло, і здавалася, што вінаваты так і не будзе знойдзены ды пакараны. Але на дапамогу прыйшлі новыя тэхналогіі, піша раённая газета «Дзянніца».
Падазраваны ў следства быў і чвэрць стагоддзя таму, і сляды на месцы злачынства ён пакінуў. Але даказаць ягоную датычнасць да забойства даступныя ў той час тэхніка-крыміналістычныя сродкі не дазволілі, таму ад гэтага чалавека мусілі адступіцца. Але з поля гледжання яго не выпускалі.
«За падазраваным увесь гэты час вёўся кантроль, — расказаў начальнік аддзялення крымінальнага вышуку крымінальнай міліцыі Іван Раманоўскі. — У 2023 годзе зламыснік — жыхар горада Шчучына — здзейсніў замах на забойства мужчыны, з якім ён сумесна распіваў спіртныя напоі. А паколькі раней быў выяўлены і канфіскаваны генетычны адбітак з адзення забітага ў 2000-м, гэты след вырашылі супаставіць з ДНК падазраванага. І сляды супалі».
Падобная генетычная ідэнтыфікацыя стала даступнай для сілавікоў у Беларусі не так даўно, у 2000 годзе такой тэхналогіі яшчэ не было. Акрамя таго, міліцыя яшчэ раз правяла працу сваякоў і знаёмых забітага, зноўку апытала сведак. У выніку фігурант цалкам прызнаў сваю віну па злачынстве 24-гадовай даўніны. У канцы снежня крымінальная справа перададзена ў суд.
Вядома, што арыштаваны мужчына неаднаразова судзімы, нідзе не працуе. Яму пагражае да 25 гадоў пазбаўлення волі.
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»29
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары