Мінюст Украіны падаў іск на прымяненне санкцый супраць Мінабароны Беларусі
У самім іску фігуруе трэцяя асоба — буйная кампанія, чый кіраўнік быў затрыманы за здраду Украіне.
Міністэрства юстыцыі Украіны 17 жніўня паведаміла аб падачы іску на прымяненне санкцый супраць Міністэрства абароны Беларусі. Адпаведны іск быў пададзены ў Вышэйшы антыкарупцыйны суд Украіны.
Згодна з матэрыяламі іску, прычынамі санкцый з'яўляецца падтрымка Расіі ў вайне супраць Украіны.
«Міністэрства абароны Рэспублікі Беларусь дзейнічае ў інтарэсах ваенна-палітычнага кіраўніцтва Расійскай Федэрацыі, удзельнічаючы ў падрыхтоўцы і арганізацыі ўзброенай агрэсіі супраць Украіны, у прадастаўленні тэрыторыі і інфраструктуры дзяржаве-агрэсару, а таксама ў пастаўках зброі, боепрыпасаў і вайсковай тэхнікі Расіі», — гаворыцца ў афіцыйнай заяве Мінюста Украіны.
У самой заяве не ўказаны патрабаванні ўкраінскага боку па іску, аднак, паводле слоў дырэктара Дэпартамента санкцыйнай палітыкі Мінюста Украіны Іны Багаціх, гаворка ідзе аб канфіскацыі ў беларускага боку авіяцыйных рухавікоў і старцёраў.
Акрамя таго, у пазове фігуруе трэцяя асоба — буйная ўкраінская кампанія «Матор Січ», чый кіраўнік Вячаслаў Багуслаеў быў затрыманы за здраду Украіне яшчэ ў мінулым годзе. Патрабаванні і пазіцыя кампаніі ў іску не прадстаўлены.
Каментары