МЗС Беларусі паабяцала «асіметрычны адказ» Польшчы на абмежаванні. І паставіла ў віну «прамы ўдзел у вайне на баку кіеўскага рэжыму»
Афіцыйны прадстаўнік беларускага МЗС Анатоль Глаз паабяцаў Польшчы «асіметрычны адказ» у сувязі з рашэннем Польшчы закрыць мяжу для грузавікоў з беларускімі і расійскімі нумарамі. Такія санкцыі Польшча ўвяла ў сувязі са зняволеннем актывіста польскай меншасці Андрэя Пачобута.
Анатоль Глаз заявіў, што «польскае кіраўніцтва сваімі рукамі стварае ўсё новыя перашкоды і нечалавечыя ўмовы для грамадзян Беларусі і Польшчы, а таксама перавозчыкаў усёй еўразійскай прасторы. На ім ляжыць уся віна за антыгуманныя наступствы такіх крокаў».
Глаз звінаваціў «рэжым Дуды — Маравецкага» ў планамернай рэалізацыі комплексу «антыбеларускіх крокаў», якія «накіраваны на правакацыю ўскладненняў і эскалацыю, у тым ліку ва ўсім рэгіёне».
«Рашэнні ўрада Польшчы таксама паказваюць, што базавыя правы чалавека, у тым ліку права на свабоду перамяшчэння, на справе для іх нічога не значаць. На гэтыя меры ў абавязковым парадку рушыць услед асіметрычны адказ. Пры гэтым намі будуць у максімальна магчымай ступені ўлічаны інтарэсы простых палякаў, вымушаных пакутаваць з-за валюнтарызму свайго ўрада, і ў максімальнай — інтарэсы нашых грамадзян», — заявіў Глаз.
У спісе прэтэнзій да Польшчы, агучаным прадстаўніком беларускага МЗС, таксама «прамы ўдзел у вайне на баку кіеўскага рэжыму».
Таксама прадстаўнік МЗС дадаў, што «ў Беларусі не прыгнятаецца ніводная з нацыянальных меншасцяў, усе грамадзяне розных нацыянальнасцяў жывуць у міры і згодзе. Любы паляк можа ў гэтым упэўніцца, спакойна наведаўшы нашу краіну ў бязвізавым рэжыме».
Што за асіметрычны адказ будзе рэалізаваны, Глаз не ўдакладніў.
З 1 чэрвеня Польшча закрыла рух праз беларуска-польскую мяжу для грузавых аўтамабіляў, цягачоў, прычэпаў і паўпрычэпаў, саставаў транспартных сродкаў, зарэгістраваных у Беларусі і Расіі.
Таксама МУС Польшчы ўключыла ў санкцыйны спіс 365 прадстаўнікоў беларускага рэжыму, а таксама 20 структур і 16 прадпрымальнікаў, пераважна звязаных з расійскім капіталам.
Гэта рэакцыя на рашэнне прысудзіць журналіста і актывіста польскай меншасці ў Беларусі Андрэя Пачобута да васьмі гадоў калоніі ўзмоцненага рэжыму. 26 мая Вярхоўны суд Беларусі разгледзеў апеляцыю і пакінуў прысуд у сіле.
Цяпер чытаюць
Слесар з Оршы бегаў ад войска на радзіме, каб пасля памерці за Пуціна. Перад адпраўкай на забой для яго закацілі дыскатэку з афрыканцамі2
Слесар з Оршы бегаў ад войска на радзіме, каб пасля памерці за Пуціна. Перад адпраўкай на забой для яго закацілі дыскатэку з афрыканцамі
Пасол Украіны па пытаннях Беларусі адказаў на дыскусію Вячоркі і крытыкаў Ціханоўскай: Ваша ўзаемная непрымальнасць адыгрывае вельмі неканструктыўную ролю4646
Каментары