ЗША змякчылі санкцыі супраць Венесуэлы за прагрэс у перамовах улады і апазіцыі
ЗША вырашылі аслабіць нафтавыя санкцыі супраць Венесуэлы ў адказ на дасягненне дамоўленасцяў паміж уладамі і апазіцыяй гэтай дзяржавы, паведаміла Міністэрства фінансаў ЗША.
Ведамства выпусціла ліцэнзію, згодна з якой кампанія Chevron на паўгода атрымлівае права здабываць нафту і вырабляць нафтапрадукты ў Венесуэле, а таксама пастаўляць іх на амерыканскі рынак.
«Гэтая мера адлюстроўвае доўгатэрміновую палітыку ЗША кропкава змякчаць санкцыі ў залежнасці ад канкрэтных крокаў, якія паслабляюць бедствы венесуэльскага народа і падтрымліваюць аднаўленне дэмакратыі», — гаворыцца ў прэс-рэлізе міністэрства.
Пры гэтым, як заявіў высокапастаўлены прадстаўнік Белага дома, Вашынгтон пакідае за сабой права як на далейшае паслабленне санкцый супраць Венесуэлы, так і на іх узмацненне.
Перад гэтым улады і апазіцыя Венесуэлы дамовіліся аб супрацоўніцтве ў забеспячэнні гуманітарнай дапамогі для краіны. Пагадненне, дасягнутае на перамовах у Мексіцы, прадугледжвае размарозку часткі валютных рэзерваў краіны ў замежных банках, замарожаных некалькі гадоў таму, калі шэраг краін Захаду, уключаючы ЗША, адмовіліся прызнаваць легітымнасць прэзідэнта Венесуэлы Нікаласа Мадуры.
Будуць размарожаныя, як паведамляюць агенцтвы, каля 3 мільярдаў даляраў, якія накіруюць на фінансаванне гуманітарных выдаткаў, як рамонт электрычных сетак або пастаўкі медыцынскага абсталявання і медыкаментаў. Кіраванне сродкамі будзе ажыццяўляцца пад эгідай ААН.
-
Украінскі журналіст назваў Наўроцкага «паханом». Яго звольнілі з польскага СМІ, а канцылярыя прэзідэнта заклікала перапісаць Канстытуцыю
-
«Гэта быў беспрэцэдэнтны акт супраць нашага народа». Аліеў упершыню пракаментаваў забойства азербайджанцаў расійскімі сілавікамі
-
Знойдзены першы камп'ютарны вірус, які выкарыстоўвае штучны інтэлект
Цяпер чытаюць
Памёр 50-гадовы спецназавец Буцько. Ён быў удзельнікам выкрадання і забойства Захаранкі і Ганчара1
Каментары