«Лепш сесці ў турму, чым быць забойцамі або згніць на полі бою». Самбіст Сцяпан Папоў звярнуўся да расійскіх калег
Беларускі самбіст Сцяпан Папоў звярнуўся да расійскіх калег з заклікам не ісці ваяваць супраць Украіны пасля таго, як 21 верасня Уладзімір Пуцін абвясціў аб частковай мабілізацыі на тэрыторыі Расіі.
«Ну што, дарагія самбісты? Від спорту, у якім максімальная колькасць людзей у пагонах і ў выдатнай фізічнай форме. Ці гатовыя вы цяпер зрабіць нешта больш, чым ліст Пуціну з падтрымкай вайны і іншыя заклікі? Абвешчаная мабілізацыя, і вы ў першых шэрагах паедзеце без візы ва Украіну!
Калі вы верыце, што там загінула толькі 5937 вашых землякоў і што там неанацысты, што вас хочуць заняволіць, то тады жадаю вам ужо бегчы ў ваенкамат. Вас пераканае толькі тое, што вы ўбачыце. Але будзе ўжо позна.
Астатніх хачу спытаць: як вы думаеце, хто з самбістаў будзе ў шэрагах «асаблівых»? Каго не закране мабілізацыя? Можа быць, чэмпіёны свету ці заслужаныя майстры спорту? А каго першымі адправяць? Маладых і неперспектыўных або ветэранаў самба?
Але залатую эліту, тых, хто падпісаў ліст Пуціну, хто праводзіць майстар-класы «Za самба», дакладна не крануць. Яны ж так шмат зрабілі для Радзімы!
Ці будзеце вы рыхтавацца да чэмпіянату свету, ці зможаце пакінуць тэрыторыю Расеі — вялікае пытанне.
Але пасля прамовы вашага дыктатара мне зразумела адно — што яму ўсё роўна, колькі людзей памрэ ў гэтай вайне. Усе яго словы — гэта нацысцкая напампоўка свайго народа і пагрозы ядзернай вайной. Страшныя ноткі, страшныя словы і страшныя законы.
Менавіта ён вас пазбаўляе многіх рэчаў, якія ў вас былі да вайны. Цяпер у вас ёсць магчымасць падумаць і прааналізаваць усе падзеі, якія адбываюцца ў вашай краіне і за яе межамі. І, магчыма, зразумець праўду і рэальную сітуацыю ў вашай краіне і вашай арміі.
Я бачыў сваімі вачыма, як і колькі украінцаў абараняюць сваю Радзіму ад вас. Мае рацыю і мацнейшы той, хто абараняе свой дом!
Цяпер ідзе вайна з ужываннем сучаснага ўзбраення, якога дастаткова ва ўкраінцаў. А стратэгія вайны Расіі — гэта Арда і колькасць, якая ідзе на забой. Улада «імператара» трымаецца толькі на падмане і вашым страху, і ёй засталося нядоўга.
Лепш сказаць гучнае «НЕ вайне», сесці ў турму і хутка выйсці з яе героямі, чым быць забойцамі або згніць на полі бою як акупант з ганьбай за падман!
Будучыня Расеі залежыць толькі ад вас, ад вашай адвагі і вашых дзеянняў. Не вайне», — напісаў Папоў.
Цяпер чытаюць
Скандал у «Еўраопце». 96‑гадоваму дзядулю не дазволілі прысесці на крэсла каля касы18
Каментары