Тры з пяці танкераў, па якіх пазаўчора ўдарылі ЗША, былі звязаныя з расійскім ценявым флотам
Тры з пяці нафтавых танкераў, па якіх амерыканскія вайскоўцы ўдарылі 8 верасня, маюць непасрэдную сувязь з расійскім «ценявым флотам». Пра гэта паведаміў упаўнаважаны прэзідэнта Украіны па пытаннях санкцыйнай палітыкі Уладзіслаў Уласюк, піша «Укрінфарм».
Паводле яго слоў, гаворка ідзе пра танкеры Kaviz, Charminar і Riesco. Яны перавозілі расійскую нафту, заходзілі ў расійскія парты і выкарыстоўваліся для працы ва ўмовах санкцый. Самі ўдары ЗША па пяці іранскіх нафтавых танкерах былі нанесеныя 8 верасня ў адказ на спробы Ірана атакаваць амерыканскі вайсковы карабель.
Танкер Kaviz, як адзначыў Уласюк, заходзіў у расійскія парты Усць-Луга і Новарасійск, перавозіў расійскую нафту і адключаў сістэму аўтаматычнай ідэнтыфікацыі AIS, якая дазваляе адсочваць рух суднаў. Ён быў звязаны з кампаніяй Fractal Marine DMCC, якую называюць адным з асноўных аператараў расійскага «ценявога флоту» ў першыя гады пасля ўвядзення санкцый супраць расійскай нафты.
Charminar, па словах Уласюка, заходзіў ва Усць-Лугу, Прыморск, Высоцк і Санкт-Пецярбург. Пасля таго як Вялікабрытанія ўвяла санкцыі супраць Fractal Marine, звязаныя з кампаніяй судны пачалі афармляць на іншых менеджараў, аднак перавозкі расійскай нафты працягнуліся. Акрамя таго, Charminar звязаны з суднаходнай структурай, якую кантралюе іранскі нафтавы магнат Махамед Хасэйн Шамхані. Гэта структура працуе адначасова з іранскай і расійскай нафтай.
Танкер Riesco, як сцвярджае Уласюк, таксама перавозіў нафту з абедзвюх краін. У прыватнасці, расійская і іранская нафта магла перамяшчацца праз перагрузкі з іншых суднаў, якія знаходзяцца пад санкцыямі. Паводле слоў украінскага чыноўніка, гэты танкер добра паказвае, як перасякаюцца расійская і іранская сістэмы абыходу санкцый.
Уладзіслаў Уласюк падкрэсліў, што ўсе тры танкеры знаходзяцца пад санкцыямі Украіны і ЗША. Kaviz, акрамя таго, уключаны ў санкцыйныя спісы Еўрасаюза, Вялікабрытаніі, Канады і Швейцарыі.
Ён заявіў, што расійскі і іранскі «ценявыя флоты» звязаныя паміж сабой праз судны, менеджараў, пасярэднікаў і маршруты перавозкі нафты. Таму, на яго думку, меры супраць такіх суднаў павінны быць суровымі незалежна ад іх фармальнага сцяга і ўладальнікаў.
Цяпер чытаюць
Расіянін месяц лётаў па Беларусі на машыне так, што атрымаў больш за 20 штрафаў на круглую суму7
Расіянін месяц лётаў па Беларусі на машыне так, што атрымаў больш за 20 штрафаў на круглую суму
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы7070
Каментары