«Буча — спецаперацыя Брытаніі». Лукашэнка зноў абслугоўвае расійскую прапаганду
Лукашэнка паведаміў, што абмеркаваў з Пуціным Бучу, назваў гэта спецаперацыяй Брытаніі.
«Калі б Расія хоць крыху спазнілася са спецыяльнай аперацыяй, Захад бы нанёс па ёй сакрушальны ўдар, — заявіў Лукашэнка на сустрэчы з Уладзімірам Пуціным на Далёкім Усходзе 12 красавіка. — Сучасны свет — жорсткая барацьба, сутыкненне цывілізацыйнага маштабу», — мяркуе Аляксандр Лукашэнка.
«Мы калісьці вырашылі, што халодная вайна скончаная, тая старонка перагорнутая, і мы будзем жыць у новым цывілізаваным, справядлівым свеце, заснаваным на ўзаемаразуменні і трыумфе міжнароднага права. Захад так не думаў. Не знішчылі яны нас тады, вырашылі паспрабаваць цяпер», — сказаў Лукашэнка.
Ëн таксама чарговы раз дагадзіў расійскай прапагандзе, усклаўшы віну за масавую гібель жыхароў Кіеўскай вобласці Украіны на Брытанію.
Падчас спробы расійскіх войскаў захапіць Кіеў загінулі не менш за 1220 мірных жыхароў. Пасля адступлення расійскай арміі з-пад Кіева, Чарнігава і Сум адкрыліся сляды зверстваў. Асабліва пацярпеў 30-тысячны горад Буча на стратэгічна важнай трасе з Кіева ў кірунку Польшчы, дзе было знойдзена больш за 320 забітых. Магчыма, бучанцам помсцілі за разгром расійскіх калон у горадзе ў першыя дні вайны, у выніку якога прасоўванне расійскай арміі спынілася.
Лукашэнка забойствы ў Бучы адмаўляе.
«Мы сёння падрабязна абмяркоўвалі «псіхалагічную спецаперацыю» у Бучы, якую правялі англічане. Калі вам трэба адрасы, паролі, яўкі, на чым прыехалі, то ФСБ РФ можа даць гэтую інфармацыю», — заявіў Аляксандр Лукашэнка.
Расія напала на Украіну 24 лютага, меркавана, разлічваючы на бліцкрыг, але ўкраінскія войскі не толькі стрымалі ворага, але на многіх кірунках перайшлі ў контрнаступ. Параза расійскіх войскаў у бітве за Кіеў у лютым-сакавіку стала пераломным пунктам першага этапу вайны.
Агрэсія супраць Украіны стала для Расіі правалам не толькі ў ваенным плане, але і ў сэнсе іміджу на міжнароднай арэне.
Цяпер чытаюць
18‑гадовы курсант Вайсковай акадэміі з Ляхавіч нікому нічога не сказаў, забраў дакументы і паехаў ваяваць за Расію. Цяпер па ім плачуць49
Каментары