«Buča — śpiecapieracyja Brytanii». Łukašenka znoŭ absłuhoŭvaje rasijskuju prapahandu
Łukašenka paviedamiŭ, što abmierkavaŭ z Pucinym Buču, nazvaŭ heta śpiecapieracyjaj Brytanii.
«Kali b Rasija choć krychu spaźniłasia sa śpiecyjalnaj apieracyjaj, Zachad by nanios pa joj sakrušalny ŭdar, — zajaviŭ Łukašenka na sustrečy z Uładzimiram Pucinym na Dalokim Uschodzie 12 krasavika. — Sučasny śviet — žorstkaja baraćba, sutyknieńnie cyvilizacyjnaha maštabu», — miarkuje Alaksandr Łukašenka.
«My kaliści vyrašyli, što chałodnaja vajna skončanaja, taja staronka pierahornutaja, i my budziem žyć u novym cyvilizavanym, spraviadlivym śviecie, zasnavanym na ŭzajemarazumieńni i tryumfie mižnarodnaha prava. Zachad tak nie dumaŭ. Nie źniščyli jany nas tady, vyrašyli pasprabavać ciapier», — skazaŭ Łukašenka.
Ën taksama čarhovy raz dahadziŭ rasijskaj prapahandzie, uskłaŭšy vinu za masavuju hibiel žycharoŭ Kijeŭskaj vobłaści Ukrainy na Brytaniju.
Padčas sproby rasijskich vojskaŭ zachapić Kijeŭ zahinuli nie mienš za 1220 mirnych žycharoŭ. Paśla adstupleńnia rasijskaj armii z-pad Kijeva, Čarnihava i Sum adkrylisia ślady źvierstvaŭ. Asabliva paciarpieŭ 30-tysiačny horad Buča na stratehična važnaj trasie z Kijeva ŭ kirunku Polščy, dzie było znojdziena bolš za 320 zabitych. Mahčyma, bučancam pomścili za razhrom rasijskich kałon u horadzie ŭ pieršyja dni vajny, u vyniku jakoha prasoŭvańnie rasijskaj armii spyniłasia.
Łukašenka zabojstvy ŭ Bučy admaŭlaje.
«My siońnia padrabiazna abmiarkoŭvali «psichałahičnuju śpiecapieracyju» u Bučy, jakuju praviali anhličanie. Kali vam treba adrasy, paroli, jaŭki, na čym pryjechali, to FSB RF moža dać hetuju infarmacyju», — zajaviŭ Alaksandr Łukašenka.
Rasija napała na Ukrainu 24 lutaha, mierkavana, raźličvajučy na blickryh, ale ŭkrainskija vojski nie tolki strymali voraha, ale na mnohich kirunkach pierajšli ŭ kontrnastup. Paraza rasijskich vojskaŭ u bitvie za Kijeŭ u lutym-sakaviku stała pierałomnym punktam pieršaha etapu vajny.
Ahresija suprać Ukrainy stała dla Rasii pravałam nie tolki ŭ vajennym płanie, ale i ŭ sensie imidžu na mižnarodnaj arenie.
Ciapier čytajuć
Čaćviortuju liniju minskaha mietro paviaduć u Dražniu. A «Ślapianka» i «Daŭhabrodskaja» źmianili svajo miesca5
Kamientary