Kiraŭnika ivent-ahienctva «Tera Hrup» aryštavali za «zdradu dziaržavie» — Jaraševič nibyta šukaŭ infarmacyju pra navapołackuju kałoniju
U varšaŭskaj «Tera Hrup» pracavaŭ da svajho tajamničaha źniknieńnia Anatol Kotaŭ.
Śledčy kamitet paviedamiŭ padrabiaznaści kryminalnaj spravy dvuch palitviaźniaŭ — 42‑hadovaha Andreja Jaraševiča i jaho 36‑hadovaha biznes-partniora.
Ź siaredziny 2000‑ch Jaraševič byŭ upraŭlajučym partnioram ivent-ahienctva «Tera Hrup».
Siłaviki vystavili biznesmienam try abvinavačvańni — zdrada dziaržavie (č. 1 art. 356), finansavańnie ekstremisckaj dziejnaści (č. 2. art. 361-2) i kradziež u asabliva bujnym pamiery (č. 4. art. 210). Minimalna mahčymaje pakarańnie — 7 hadoŭ kałonii. Maksimalnaje za zdradu dziaržavie — 15 hadoŭ, ale z ulikam inšych artykułaŭ moža być jašče bolšym.
Jak ličać siłaviki, Jaraševič nibyta źbiraŭ infarmacyju pra navapołackuju kałoniju №1 — piersanalnyja danyja supracoŭnikaŭ i ŭmovy ŭtrymańnia asudžanych. Pa viersii SK, usio heta rabiłasia dla «Biełpoła».
Aproč taho, Jaraševič i jaho biznes-partnior nibyta vykarystoŭvali svaju kampaniju dla finansavańnia «ekstremisckich farmiravańniaŭ» Terra Group Event i SSL Production.
Suzasnavalnikam biełaruskaj «Tera Hrup» źjaŭlaŭsia Vital Kryŭko. Jon pracavaŭ u štabie Viktara Babaryki, paśla vybaraŭ byŭ aryštavany, paśla čaho atrymaŭ chatniuju chimiju i ŭrešcie emihryravaŭ.
Ciapier Kryŭko žyvie ŭ Polščy, dzie adkryŭ ivent-ahienctva — taksama z nazvaj «Tera Hrup». U im pracavaŭ palityk Anatol Kotaŭ, jaki tajamniča źnik u Turcyi ŭ žniŭni 2025 hoda.
Siłaviki paličyli, što biełaruskaje ivent-ahienctva pieradavała svoj prybytak polskaj jurydyčnaj asobie — jakuju postfaktum, u listapadzie 2025 hoda, abvieścili ekstremisckim farmavańniem.
Narešcie, treciaje abvinavačvańnie zaklučajecca ŭ tym, što adzin ź fihurantaŭ nibyta prysvoiŭ sabie bolš za 240 tysiač rubloŭ, vypłaciŭšy sabie dyvidendy biez zhody inšych ułaśnikaŭ. Niajasna, havorka idzie pra Jaraševiča ci jaho biznes-partniora.
Jaraševič byŭ aryštavany ŭ sakaviku 2025 hoda. Z taho času znachodzicca ŭ SIZA. Jaho biznes-partnior taksama za kratami.
-
Franak Viačorka: U nas afihiennaja dyjaspara, ale nyćcio pra toje, što ŭsio kiepska, dematyvuje. My nie ŭmiejem pradavać pośpiechi
-
Troch polskich śviataroŭ vysłali ź Biełarusi
-
«Pry znajomstvie pradstaŭlałasia: «Maryna». Hutarka z byłoj hałoŭnaj redaktarkaj Tut.by, palitźniavolenaj i švačkaj homielskaj kałonii
Ciapier čytajuć
Pamiatajecie Daniłu z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ i z čaho ŭsio pačałosia
Kamientary