Najlepšym fota hoda pavodle World Press Photo stała FOTA siamji mihrantaŭ u ZŠA, jakuju prymusova raździalajuć
Abvieščany łaŭreaty štohadovaj premii World Press Photo. Fatahrafijaj hoda stała vyjava masavaj departacyi mihrantaŭ z ZŠA.
Fatahrafijaj hoda pavodle niekamiercyjnaj arhanizacyi World Press Photo pryznany zdymak «Raździelenyja supracoŭnikami Imihracyjnaj i mytnaj słužby ZŠA» amierykanskaha fatohrafa Keroł Huzi.
Takoje rašeńnie arhkamitet adnajmiennaha fotakonkursu ahučyŭ u čaćvier, 23 krasavika. Praca ŭvachodzić u sieryju «Aryšty Imihracyjnaj i mytnaj słužby ZŠA ŭ sudzie Ńju-Jorka» dla štodzionnaj haziety Miami Herald, piša Deutsche Welle.
Huzi zafiksavała momant, kali pradstaŭniki pravaachoŭnaha viedamstva advodziać Łuisa, mihranta z Ekvadora, ad jaho siamji paśla sudovaha pasiadžeńnia pa spravie ab nielehalnaj mihracyi
Hety epizod źjaŭlajecca «nie adzinkavym vypadkam, a palitykaj, jakaja biez razboru prymianiajecca da ludziej, što dobrasumlenna źjavilisia na sudovyja słuchańni», padkreślili ŭ arhkamitecie konkursu. U demakratyčnym hramadstvie prysutnaść fotakamier u sudovych kalidorach źjaŭlajecca «važnym śviedkam palityki, jakaja pieratvaryła budynki sudoŭ u miescy, dzie razburajucca žyćci ludziej», adznačyli ŭ World Press Photo.
U 2025 hodzie ŭ šerahu haradoŭ ZŠA prajšli pratesty suprać uzmacnieńnia mihracyjnaj palityki administracyi prezidenta Donalda Trampa i kursu na masavyja departacyi mihrantaŭ.
«Hetaja ŭznaharoda padkreślivaje vielizarnuju važnaść hetaj historyi va ŭsim śviecie. My stali śviedkami pakut nieźličonych siemjaŭ, ale taksama śviedkami ich hodnaści i stojkaści, jakija dazvalajuć im pieraadolvać ciažkaści. <…> Biezumoŭna, hetaja ŭznaharoda naležyć im, a nie mnie», — adznačyła Huzi, kamientujučy vybar žury.
Kamientary
Vy fatohraf i pracujecie ŭ takich miescach?