Рэзкія выказванні доктара з Касцюковічаў: меркаванні карыстальнікаў пра яго ўчынак разышліся
«Чыста доктар, які прыняў рэальнасць. І ён больш чым правы» — «Як людзі могуць пісаць, што ён мае рацыю?! Куды коціцца свет?»
Аляксей Грэйцар не вызначаўся поспехамі ў вучобе: паводле балаў ён быў трэцім з канца сярод сваіх аднакурснікаў-хірургаў. Тым не менш, адпрацаваўшы ўсяго два гады ў Касцюковіцкай цэнтральнай раённай бальніцы, ён заняў пасаду загадчыка траўматалагічнага аддзялення. Гэта вынік вялізнага дэфіцыту кадраў у беларускай медыцыне.
Малады доктар актыўна вёў сацыяльныя сеткі, дзе ў публічных дыскусіях дазваляў сабе даволі спрэчныя выказванні. Фактычна ён ставіў пад сумнеў неабходнасць аказання дапамогі некаторым пацыентам, ужываў грубую лексіку і жорстка з іх жартаваў. Гісторыя атрымала розгалас. Акаўнт Грэйцара, з якога пісаліся каментары, быў выдалены, а з сайта бальніцы знікла інфармацыя пра яго як пра загадчыка аддзялення.
Ролік у TikTok пра маладога доктара паглядзела больш за мільён карыстальнікаў. Каментатары пад відэа падзяліліся на два супрацьлеглыя лагеры.
Так па фактах усё
Шмат хто лічыць, што Грэйцар мае рацыю:
«А ў чым ён не правы?», «І дзе ён памыляўся?!)», «Усё ён казаў правільна», «Дык па фактах усё».
Многія ўпэўненыя:
«Доктар выдаў базу, якую ніхто не агучвае ўголас».
«Як жа я з ім згодны», — дадае нехта яшчэ.
«Прыгажун, малойца! А ўся бяда — гэта бясплатная медыцына. Ніколі яна не будзе добрай», — выказвае сваё захапленне чарговы каментатар.
«Чыста доктар, які прыняў рэальнасць. І ён больш чым мае рацыю», — заўважае наступны.
Карыстальнікі звяртаюць увагу на сістэмныя праблемы:
«На прыкладзе той жа хуткай дапамогі: прымушаюць распыляцца на ўсякую агідную дробязь, што адбірае сілы і магчымасць дапамагчы іншым людзям».
Некаторыя каментатары заступаюцца за маладога спецыяліста, звяртаючы ўвагу на складаныя ўмовы працы і падзяляючы прафесійныя абавязкі і права на асабістае меркаванне па-за межамі бальніцы:
«Ды яны шмат працуюць за капейкі, стаўленне жахлівае, дэфіцыт кадраў велізарны, але пры гэтым на яго ціснуць за ягонае меркаванне. У маім разуменні гэта на працы ён доктар і абавязаны выконваць прафесійную этыку. А дома ён можа выліваць і пісаць усё, што думае. Ды і да каментароў у мяне пытанняў няма. Дыктар агучвае адно, на экране — іншае».
«То-бок усе могуць пісаць у інтэрнэце што хочуць, а калі ты доктар — не можаш? Тут нічога не сказалі наконт яго працы ў рэальным жыцці. Кожны піша што хоча, а для дактароў нейкія іншыя правілы?» — даводзіць інішы.
На погляд яшчэ аднаго беларуса, праблема не ў асобе, а ў самой сістэме аховы здароўя:
«Гэты доктар не мае рацыі па форме, але мае рацыю па сутнасці… Не ўсе каментатары, якія яго асуджаюць, ведаюць, у якіх умовах працуюць дактары. А ўмовы гэтыя прыдумляюць у міністэрствах, дзе часта да практычнай медыцыны дачынення не маюць, але «ведаюць, як лепш»».
«Доктар так не павінен рабіць»
Хапае і крытычных водгукаў.
Каментар «Ключавыя словы «трэці з канца». А стаў загадчыкам аддзялення» набраў больш за 5300 лайкаў.
Людзі дзівяцца таму, як хутка малады выпускнік з нізкай паспяховасцю заняў кіруючую пасаду, і задаюцца пытаннем: няўжо дасведчаных дактароў зусім не засталося?
«Трэці з канца. Лепш за любую характарыстыку», «Мне страшна за нашу медыцыну. Хірург трэці з канца — і загадчык?» — абураюцца людзі.
На заўвагі пра тое, што Грэйцар кажа праўду, іншыя адказваюць:
«Што менавіта праўда? Няхай табе пападзецца такі доктар», «Што правільна? Што дактары лекаваць людзей не хочуць?»
Многія ўпэўненыя, што статус доктара патрабуе іншага ўзроўню культуры:
«Доктар так не павінен рабіць».
«Як людзі могуць пісаць, што ён мае рацыю?! Куды коціцца свет?» — заўважае нехта ў каментарах.
Каментары
За это прислуге бюджетной и платят.