«Пахавальныя вянкі». Улады Гродна спыталі гараджан пра аркі на галоўнай вуліцы. Больш за 1000 каментароў — і амаль усе супраць
У Гродне разгарэлася дыскусія пра дэкаратыўныя аркі, якія з’явіліся на галоўнай пешаходнай вуліцы Савецкай у 2025 годзе. Пасля хвалі крытыкі цягам года гарадскія ўлады вырашылі запытаць у жыхароў: пакінуць аркі на новы сезон ці прыбраць. Адказ прыйшоў хутка: за суткі пад допісам у Instagram сабралася больш за 1200 каментароў.
«Яны закрываюць горад»
Пераважная большасць каментатараў настойвае: аркі трэба прыбраць. Асноўны аргумент — аркі не ўпісваюцца ў гістарычны цэнтр. Людзі пішуць, што канструкцыі «перакрываюць від на будынкі», «знішчаюць перспектыву вуліцы» і робяць цэнтр візуальна цяжкім, а зімой наогул падобныя на пахавальныя вянкі. Асабліва гучна пра гэта кажуць гродзенскія экскурсаводы і мясцовыя блогеры, каментары якіх збіраюць дзясяткі і сотні лайкаў.
«Аркі абясцэньваюць гістарычную каштоўнасць вуліцы. Будынкаў амаль не відаць»», — піша адзін з каментатараў.
Гродзенцы настойваюць: галоўнае на Савецкай — гэта архітэктура, практычна кожны будынак там з шыльдай «гісторыка-культурная каштоўнасць». І калі яе пачынаюць дапаўняць металічнымі канструкцыямі з кветкамі, яна проста губляецца.
«З аркамі знікае ўся прыгажосць і прастора», — дзеляцца меркаваннем.
У каментарах гродзенцы называюць аркі «візуальным шумам» і «таннай імітацыяй упрыгожвання», перадусім з-за штучных кветак і пластыкавых дэталяў.
«Прыбіраем — і як мага хутчэй. Гэтыя жахлівыя аркі псуюць аблічча гістарычнага цэнтра і адной з галоўных пешаходных вуліц. Гродна заўсёды прыцягваў турыстаў тым, што ў ім захаваўся дух эпохі. Раней, шпацыруючы па вуліцы Савецкай, можна было любавацца прыгажосцю архітэктуры. А цяпер аркі сталі незаслужана «галоўнай славутасцю» — менавіта ў двукоссі. Яны літаральна з’ядаюць прастору і ператвараюць наш старажытны і прыгожы горад у нейкі навадзел.
Гістарычная вуліца ператварылася ў пляцоўку для гульні ў «Ручаёк». Вярніце гродзенцам іх любімы горад, а самому Гродна — яго першапачатковае і непаўторнае гістарычнае і архітэктурнае аблічча!!!» — заклікаюць.
Людзі нагадваюць, што гэта ўжо сфармаваная гістарычная прастора, якая сама па сабе працуе як турыстычны аб’ект: адрэстаўраваныя фасады, перспектыва вуліцы, атмасфера старога горада.
«Горад, які сябе паважае, не будзе ўпрыгожваць гістарычны цэнтр пластыкам», — пішуць у каментарах.
Тыя, каму аркі не здаюцца катастрофай, прапануюць іх проста перанесці. Напрыклад, у парк, спальны раён ці на набярэжную.
Аргумент просты: у гістарычным цэнтры ім не месца, але як элемент гарадскога дэкору яны могуць жыць дзесьці яшчэ.
Аргументы «за» ёсць, але іх вобмаль
Каментары ў падтрымку аркаў таксама ёсць, але іх значна менш.
Сярод аргументаў, якія гучаць: аркі, маўляў, робяць вуліцу «жывой» і «утульнай», дадаюць фотазоны і прывабліваюць турыстаў, кампенсуюць недахоп зеляніны ў каменным цэнтры.
Некаторыя прапануюць не прыбіраць аркі, а дапрацаваць, напрыклад, замяніць штучныя кветкі на жывыя, схаваць камунікацыі, зрабіць канструкцыі больш эстэтычнымі. Але гэтыя каментары атрымліваюць у некалькі разоў менш падтрымкі, чым крытычныя.
Каментары