Энергія пустыні замест пуцінскага газу? Вось што можа выратаваць Еўропу
13 гадоў таму ўжо абмяркоўваўся праект таго, як можна перадаваць у Еўропу сонечную энергію цераз Міжземнае мора. Тады сысціся на дэталях не атрымалася, але цяпер пра Desertec — так гучыць назва праекта — зноў успомнілі. У цяперашніх палітычных умовах ён можа дапамагчы Еўропе выжыць без пуцінскага газу.
Ініцыятыва Desertec з’явілася ў Германіі і была заснаваная на працы фізіка Герхарда Кніеса. Той падлічыў, што за шэсць гадзін ва ўсе пустыні Зямлі трапляе столькі ж сонечнай энергіі, колькі патрэбна ўсяму чалавецтву на год. Адпаведна гэтую энергію з Сахары можна было б перадаць у Еўропу, тлумачыць onet.pl.
13 гадоў таму гэтая ідэя выклікала эйфарыю. Напрыклад, тагачасны кіраўнік кампаніі Siemens Петэр Лёшэр называў Desertec «праектам «Апалон» 21 стагоддзя», параўноўваючы яго з касмічнай праграмай, што некалі дапамагла адправіць першых людзей на Месяц. У той жа час 12 кампаній аб’ядналіся ў ініцыятыву Desertec Industrial Initiative, што павінна была займацца праектам.
Але ж, як аказалася, перайсці да канкрэтнай працы больш цяжка, чым чакалася. У 2014 годзе інвестары страцілі цярпенне і перакрылі ініцыятыве кісларод, у той жа час закрылася мюнхенская штаб-кватэра Desertec Industrial Initiative.
Адзін з тагачасных сузаснавальнікаў Desertec, Пол ван Сон, частку віны за гэта ўскладаў на нямецкіх палітыкаў. Нягледзячы на паводзіны Расіі — у той час Масква анексіравала Крым — Германія дазволіла сабе павялічыць залежнасць ад расійскага газу з 35 да 55 працэнтаў за дзесяць гадоў.
Зараз, калі Еўропа ставіць сабе за мэту пазбавіцца ад энергетычнай залежнасці ад Расіі, Desertec можа стаць выратаваннем. Кампанія змяніла стратэгію і прапануе новы план, згодна з якім сонечная і ветраная энергія будзе паступаць на электролізныя ўстаноўкі на марскім узбярэжжы. Там будзе вырабляцца газ, які стане самым важным энерганосьбітам будучыні — вадарод.
У наш час кансорцыум Desertec уключае ў сябе больш чым 60 кампаній, і сярод іх такія гіганты, як ThyssenKrupp і Siemens Energy. У выніку працы яны разлічваюць атрымаць не толькі танную, але і экалагічна чыстую энергію.
Вайна ва Украіне, змены клімату і рост цэнаў на энерганосьбіты — усе гэтыя рэчы спрыяюць павышанай увазе да Desertec. Цана сонечнай энергіі, вырабленай у пустыні, складае менш чым два цэнты за квт/гадз. Электролізныя ўстаноўкі робяцца ўсё таннейшымі і ўсё больш эфектыўнымі. У выніку вадарод, выраблены ў Паўночнай Афрыцы, можа ў лепшым выпадку стаць такім жа танным, як і расійскі газ.
У Польшчы выпрацавалі рэкордную колькасць энергіі ад сонечных батарэй
Як маскоўскі Цэнтрабанк здолеў падняць курс расійскага рубля
Цяпер чытаюць
Анатоль Котаў ужо выязджаў у Турцыю і лічыў яе бяспечнай — крыніцы10
Каментары