Што паглядзець. «Рычар» — крымінальны серыял, ад якога нават крытыкі ў захапленні
«Рычар» — гэта класічны баявік, якога вы даўно чакалі: з пераследам, змовай і таямніцамі. Мо таму ён і мае такую папулярнасць.
Гэта гісторыя Джэка Рычара, былога ваеннага і следчага, які вырашыў сысці са службы і паспрабаваць жыць як просты грамадзянін.
Рычар едзе ў падарожжа па роднай краіне, якой некалі служыў. Але калі ён прыязджае ў невялікі горад у штаце Джорджыя, там адбываецца першае за 20 гадоў забойства. Відавочцы сведчаць, што яны бачылі на месце забойства Рычара, і паліцэйскія яго арыштоўваюць.
Ветэран спрабуе даказаць сваю невінаватасць, але разумее, што мае справу са змовай вакол сябе. Цяпер яго задача — аднавіць справядлівасць і знайсці сапраўднага злачынцу.
Серыял «Рычар» знялі на аснове дэтэктываў пісьменніка Лі Чайлда. Па гэтых творах ужо знятыя дзве поўнаметражкі, і ў абедзвюх роль ветэрана выконвае зорка баевікоў Том Круз. Аднак аматары твораў Чайлда лічаць, што Круз для гэтай ролі не надта падыходзіць, і не ў апошнюю чаргу праз свой рост. У акцёра рост — 170 сантыметраў, а кніжны Рычар — велікан вышынёй у 195 сантыметраў і з вагой у 120 кілаграмаў.
Рычар: валацуга без родных і сувязей, які выблытваецца з небывалых гісторый
У тым, што тычыцца знешнасці галоўнага героя, новы серыял адпавядае кніжнай першакрыніцы. Рычара грае Алан Рычсан, і гледачы серыяла нават наракалі, што ён перакачаны для Рычара. Аднак Алан больш спакойны і абаяльны, чым Круз, яго герой здольны на добрыя жарты.
Гэта просты валацуга, які не мае ні сямейных сувязяў, ні сацыяльных абавязкаў. Рычар не карыстаецца ні тэлефонам, ні інтэрнэтам з сацсеткамі, з усіх рэчаў ён мае толькі пачак наяўных, пашпарт і зубную шчотку. Ён здольны на нядрэнную дэдукцыю і выкручваецца з усіх непрыемнасцей, у якія трапляе.
Назіраць за яго прыгодамі весела, ды ён і сам атрымлівае ад іх кайф. Дапамагло і тое, што стваральнікі серыяла з вялікай увагай паставіліся да кніг, на базе якіх ён створаны. Рычсан, напрыклад, прачытаў усе 24 раманы пра Джэка Рычара, каб падрыхтавацца да ролі.
А яшчэ стваральнікі серыяла зрабілі цэлы спіс дэталяў, якія характэрныя для кніжнага Рычара, і якія важна было ўлічваць у тэлеверсіі гісторыі. Напрыклад, Джэк Рычар заўсёды п'е толькі чорную каву, ён ніколі не ставіцца да жанчын дрэнна. Гэта адначасова вельмі просты і вельмі складаны персанаж.
Прадстаўнікі стрымінгавай платформы Amazon, што выпусціла новага «Рычара», кажуць, што
серыял увайшоў у пяцёрку самых праглядаемых за першыя 24 гадзіны з моманту рэлізу ў ЗША і ва ўсім свеце.
Гэта таксама адзін з нешматлікіх арыгінальных серыялаў платформы з высокім рэйтынгам — 4,7 з 5 магчымых балаў. У выніку «Рычара» працягнулі на другі сезон усяго праз тры дні пасля прэм’еры першага.
Крытыкі лічаць новы серыял першай паспяховай адаптацыяй кніг Чайлда. У рэцэнзіях «Рычара» называюць «вялікім вяртаннем культавага героя», Guardian згадвае героя Рычсана як «некага, кім Том Круз ніколі не будзе». Іншае аўтарытэтнае выданне, RadioTimes, піша, што жаданне паспрабаваць новы накірунак для гісторыі Рычара — зняць серыял — можа аказацца разумным крокам.
Рэйтынгі на вялікіх сусветных рэсурсах
IMDB - 8,4/10.
Rotten Tomatoes - 88%.
Што паглядзець. «Мюнхен: на мяжы вайны» — шпіёнскі трылер пра Мюнхенскую змову, які пакідае адчуванне дэжавю
Восем фільмаў і міні-серыялаў пра тыранаў і дыктатуры, якія варта паглядзець
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2929
Каментары