Трэці падазраваны ў атручванні былога рускага шпіёна Сяргея Скрыпаля і яго дачкі мог быць датычны да атручвання прадпрымальніка ў Балгарыі, якое адбылося ў 2015 годзе. Пра гэта гаворыцца ў сумесным расследаванні Bellingcat, расійскага выдання The Insider і балгарскага Capital.
Следчыя ўстанавілі, што трэці падазраваны ў атручванні Скрыпалёў — афіцэр расійскага Галоўнага разведвальнага ўпраўлення (ГРУ), які хаваецца пад імем «Сяргей Фядотаў» — быў у Балгарыі ў красавіку 2015 года за некалькі дзён да атручвання мясцовага прадпрымальніка Еміліана Гебрава і яго сына.
«Фядотаў», гэтак жа як і яго калегі Анатоль Чапіга і Аляксандр Мішкін, атрымаў сваю новую ідэнтыфікацыю ў 2010 годзе. Ён актыўна падарожнічаў па Еўропе, Азіі і Блізкім Усходзе, як правіла, з'яўляючыся ў «гарачых кропках» за некалькі дзён да падзей, якія потым траплялі ў навіны.
Паездка «Фядотава» у Балгарыю ў 2015-м годзе мае вельмі шмат агульнага з падзеямі ў Солсберы, калі атруцілі Скрыпалёў. 24 красавіка 2015 года расійскі разведчык прыбыў рэйсам з Масквы на балгарскі курорт Бургас. У яго быў білет на зваротны рэйс на 30 красавіка з Сафіі ў Маскву. Аднак ён не з'явіўся на гэты рэйс. Замест гэтага, позна ўвечары 28 красавіка, ён з'явіўся ў аэрапорце Атацюрка ў Стамбуле і ў апошнюю хвіліну набыў білет на рэйс у Маскву.
Раней у гэты дзень балгарскі прадпрымальнік Еміліан Гебраў быў шпіталізаваны пасля таго, як страціў прытомнасць на прыёме ў Сафіі. Прыкладна ў гэты ж час яго дарослы сын і адзін з кіраўнікоў яго кампаніі раптоўна захварэлі. Усе трое былі шпіталізаваны з сімптомамі цяжкага атручвання. Стан Еміліяна Гебрава хутка пагоршыўся, і ён трапіў у кому. Дактары выказалі здагадку, што атрута была выкарыстана ў дзень або дні, якія папярэднічалі 28 красавіка. Аднак дактары не змаглі вызначыць яе.
Балгарская бальніца звярнулася па дапамогу да двух вядучых лабараторый, якія спецыялізуюцца на кантролі хімічнай зброі. Адна з іх, лабараторыя Універсітэта Хельсінкі, правяла пільны аналіз і змагла ўсталяваць сляды двух арганафасфатаў, якія сведчылі пра тое, што прадпрымальніка спрабавалі забіць нервова-паралітычным рэчывам, якія адносяцца да сямейства «Навічка», перадае The Insider.
Праз месяц пасля шпіталізацыі стан Еміліана Гебрава істотна палепшыўся, і яго выпісалі. Ён распавёў Bellingcat, што праз некалькі дзён, у канцы мая, ён зноў адчуў сябе дрэнна і быў паўторна шпіталізаваны.
У гэты ж час, 24 мая 2015 года, «Сяргей Фядотаў» вярнуўся ў Балгарыю прамым рэйсам з Масквы. Ён забраніраваў зваротны рэйс на 28 мая 2015 года, аднак зноў не з'явіўся на яго. Праз два дні, 30 мая, ён вылецеў з суседняй Сербіі ў Маскву.
Паездка «Фядотава» ў Вялікабрытанію падчас атручвання Скрыпалёў адбывалася па той жа мадэлі. Ён прыбыў у Злучанае Каралеўства ў той жа дзень, што Чапіга і Мішкін, але на іншым самалёце. Ён павінен быў вылецець 4 сакавіка 2018 года, калі Скрыпалі былі атручаны, але, як і ў выпадку з Балгарыяй, «Фядотаў» не з'явіўся на рэйс. Замест гэтага ён вярнуўся ў Маскву з іншай еўрапейскай сталіцы праз некалькі дзён.
Еміліан Гебраў звязвае цікавасць расійскіх спецслужбаў да сваёй асобы з дзвюма магчымымі прычынамі. Першая — ён быў экспарцёрам спецыялізаванай ваеннай тэхнікі ва Украіну. Прадпрымальнік кажа, што ён ажыццяўляў пастаўкі «ў строгай адпаведнасці з балгарскімі і еўрапейскімі нормамі». Другая прычына — магчымая зацікаўленасць Расіі ў кантраляваным ім заводзе-вытворцы зброі, якая лічацца стратэгічна важнай для Балгарыі і НАТА.
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары