Гэта лета ў Беларусі чакаецца крыху цяплейшае, чым звычайна, паведаміў БЕЛТА начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Дзмітрый Рабаў.
«Лета ў 2017 годзе чакаецца крыху цяплейшае, чым звычайна, сярэднесезонная тэмпература паветра на большай частцы будзе на паўградусы, а па паўднёва-заходняй палавіне на градус вышэйшая за норму (норма — плюс 16,8). Колькасць ападкаў чакаецца меншая за норму (норма 244 мм). Ападкі на працягу сезона будуць размяркоўвацца нераўнамерна», — расказаў сіноптык. Паводле слоў Дзмітрыя Рабава, ліўневыя дажджы гэтым летам нярэдка будуць суправаджацца навальніцамі, шкваламі, а часам і градам.
«Чакаецца ў летні перыяд і спёка: яе нам забяспечаць блакіруючыя антыцыклоны, якія не будуць пускаць у краіну вільготныя паветраныя масы. Прагназуецца некалькі перыядаў гарачыні працягласцю не больш за тыдзень. У сувязі з глабальным пацяпленнем так званыя блакіруючыя антыцыклоны сталі з'яўляцца часцей, менавіта яны ўтрымліваюць у нас сухое і гарачае надвор'е летам. Пры гэтым устанаўліваецца высокая і надзвычайная пажаранебяспека», — папярэдзіў Дзмітрый Рабаў.
Самае цёплае лета назіралася ў 2010 годзе, калі ў сярэднім па краіне тэмпература паветра за сезон дасягнула плюс 20,6 градуса і ўсе летнія месяцы былі цяплейшыя, чым звычайна, асабліва чэрвень з сярэднямесячнай тэмпературай паветра плюс 22,6. Ён стаў самым цёплым месяцам за ўвесь перыяд назіранняў (на 4,8 градуса вышэй за кліматычную норму). Самы дажджлівы летні сезон, з колькасцю ападкаў 335 мм, быў у 1998 годзе. Менш за ўсё — 111 мм ападкаў — назіралася за лета 1992 года.
Дзмітрый Рабаў таксама расказаў, якое надвор'е чакаецца ў кожным летнім месяцы. Так, у чэрвені сярэдяя месячная тэмпература паветра на большай частцы краіны прагназуецца на 0,5 градуса, а па захадзе на 1 градус вышэйшая за кліматычную норму (норма 15-17 градусаў цяпла). Але пры гэтым месячная колькасць ападкаў чакаецца меншая за кліматычную норму (норма 69-87 мм).
Сярэдняя месячная тэмпература паветра ў ліпені прагназуецца на большай частцы на 1 градус вышэйшая за кліматычную норму, а па паўночным усходзе - на 0,5 градуса (норма 17-19 градусаў вышэй за нуль). Месячная колькасць ападкаў чакаецца меншая за сярэднія шматгадовыя значэнні (норма 74-97 мм).
Сярэдняя месячная тэмпература паветра ў жніўні таксама прагназуецца на 1 градус вышэйшая за кліматычную норму (кліматычная норма плюс 16-17 градусаў). Месячная колькасць ападкаў мяркуецца ў межах сярэдніх шматгадовых значэнняў, па паўднёвай палавіне большая за норму (кліматычная норма 62-89 мм).
Каментары