Улады Малдовы абмежавалі перамяшчэнне расійскіх вайскоўцаў, якія знаходзяцца ў Прыднястроўі. Паводле афіцыйнай інфармацыі, шэсць высокапастаўленых афіцэраў расійскай аператыўнай групы войскаў, якая там дыслакуецца, абвешчаныя ў Малдове персонамі нон-грата, піша Deutsche Welle.
Прынятае рашэнне азначае, што расійскім камандзірам забаронена знаходзіцца на тэрыторыі Малдовы, якая кантралюецца ўладамі краіны (на правым беразе Днястра).
Калі хто-небудзь з іх паспрабуе трапіць туды, яго адразу дэпартуюць з Малдовы без права вяртання.
Фактычна гэта азначае, што камандаванне расійскага кантынгенту застаецца абмежаваным у сваіх перамяшчэннях тэрыторыяй Прыднястроўя, бо праз тэрыторыю Украіны выбрацца з яго цяпер тым больш не атрымаецца.
У лік непажаданых асоб увайшлі камандуючы групы войскаў Дзмітрый Зелянкоў, тры яго намеснікі — Дзмітрый Апалеў, Сяргей Мошчанка і Сяргей Шыршоў, — а таксама начальнік штаба Марат Ярулін і кіраўнік палявога банка ў Ціраспалі Аляксей Багамолаў.
Акрамя таго, абмежаванні закранаюць і сем’і гэтых афіцэраў: яны трацяць доступ да шэрагу паслуг на тэрыторыі Малдовы, у тым ліку да медыцынскай дапамогі і афармлення дакументаў.
Малдаўскі бок тлумачыць гэтыя меры тым, што прысутнасць расійскіх войскаў лічыцца незаконнай і разглядаецца як пагроза бяспецы краіны.
Каментары