Сумкі з гальштукаў і заплечнікі з пакункаў ад чыпсаў Lays — топ беларускіх майстроў, якія робяць апсайклінг-рэчы
Трэнд на адзенне і аксесуары са старых рэчаў працягвае набіраць усё большую папулярнасць. Некаторыя дызайнеры ствараюць сапраўдныя шэдэўры з таго, што іншыя адправілі б на сметнік.
Сабралі топ апсайклінг-вырабаў ад беларускіх майстроў.
Топы з абрусаў і торбы з гальштукаў
Брэнд Galubka, створаны Таццянай Голубевай, пачынаўся са складаных шматслойных кашуль і аверсайз-лонгсліваў. Пазней яна таксама дадала да сваіх эксперыментаў хусткі і топы з бабуліных сурвэтак. А зусім нядаўна пачала шыць торбачкі з гальштукаў.
Большую частку «сыравіны» майстрыца знаходзіць у сэканд-хэндах, звяртаючы ўвагу толькі на рэчы ў добрым стане.
Далікатная «сурвэтачная» калекцыя ад брэнда PLUM
Адзенне ад Plum славіцца сваімі ўнікальнымі рэчамі — большасць з іх непаўторныя і прапаноўваюцца ў адзіным экзэмпляры. Так выйшла і з капсулай One-of-a-Kind з рэчамі, сшытымі з вінтажных тканін. Нешта з іх раней было сурвэткамі і накідкамі з непаўторнай вышыўкай.
Цэны на такія камплекты вар’іруюцца ад 150 да 300 даляраў.
Цэлы гардэроб з фіранак
Брэнд TSUDA таксама не прайшоў міма моды на традыцыйны, часам вясковы вайб. Тут можна знайсці і кімано, і манішкі, і фартухі, і штаны, і хусткі — і ўсё гэта створанае з фіранак.
Такія рэчы дадаюць вобразам шматслойнасці і арыгінальнасці, адразу звяртаючы на сябе ўвагу. Цэны на вырабы стартуюць ад 69 даляраў.
Шоперы-калажы
Мастачка Марыя Аўдзяюк з Брэста шые прышпільныя цацкі і шоперы са старога адзення і тканін, што заляжаліся ў бабулі.
Атрымліваюцца вельмі арыгінальныя і яркія торбы з разнастайнымі сюжэтамі — напрыклад, з вясковай хаткай пад вішняй, італьянскім пейзажам ці матывацыйным пасылам «Усё магчыма».
Кошт шопераў: 90 рублёў.
Кашалькі з пластыкавых пакетаў
Мінчук Артур ужо некалькі гадоў развівае свой эка-брэнд Iriskin.ecolab — ён з галавой нырнуў у справу надання другога жыцця матэрыялам, пра якія большасць з нас нават не падумала б, што яны на нешта прыдатныя.
Хлопец шые неардынарныя кашалькі і вокладкі на пашпарты з пакункаў ад кавы і пластыкавых пакетаў, шоперы з рэкламных банераў і нават торбы і заплечнікі з батутнай сеткі.
Для Артура ўсё гэта не проста азарт і шырокае (плюс досыць бюджэтнае) поле для творчых эксперыментаў, але і ўласны ўнёсак у экалогію.
Цэны — у залежнасці ад складанасці рэчаў (ад 25 да 200 рублёў).
Бомберы з савецкіх посцілак
Мінчанка Крысціна Жаўрыд стварае верхняе адзенне з посцілак, якія ў найлепшым выпадку раней віселі на сценах ці ўпрыгожвалі ложкі ў інтэр’ерах, а ў горшым — проста ляжалі мёртвым грузам у шафах некалькі дзясяткаў гадоў.
На посцілкі розных колераў, а таксама габелены дзяўчына палюе на сайтах кшталту «Куфра». Набытую базу рупліва мые, а пасля сядае за шыццё — усё робіцца рукамі, таму і цэны на гатовыя вырабы ад 150 даляраў.
Пры гэтым бомберы раскупляюць вельмі хутка, як унутры Беларусі, так і за мяжой.
Цяпер чытаюць
Малады работнік «Мінск-Арэны» павінен заплаціць 71 мільён даляраў2
Каментары