Мільярдэр Ілан Маск зноў стане афіцыйным дарадцам адміністрацыі прэзідэнта ЗША Дональда Трампа. Ён будзе адным з кіраўнікоў Project Meridian — праекта Пентагона, прысвечанага вывучэнню таго, як могуць выглядаць войны будучыні, піша Euronews.
Пра гэта кіраўнік Пентагона Піт Хегсет заявіў 30 верасня на вайсковай базе Куанціка. З ягоных слоў, Project Meridian стане ініцыятывай, у якой будуць працаваць найбольш моцныя амерыканскія спецыялісты, каб даследаваць будучыню вядзення войнаў. У праект плануюць прыцягнуць прадстаўнікоў прыватнага сектара, а таксама экспертаў з інавацыйнай, акадэмічнай і палітычнай сфер.
Маск будзе адным з трох сустаршыняў праекта. Разам з ім яго ўзначаляць 34‑гадовы Палмер Лакі, сузаснавальнік абароннай тэхналагічнай кампаніі Anduril Industries, і 83‑гадовы Ньют Гінгрыч, былы спікер Палаты прадстаўнікоў ЗША ад Рэспубліканскай партыі.
Хегсет заявіў, што праект павінен вызначыць напрамкі, у якіх ЗША неабходна атрымаць перавагу, і тэхналогіі, якімі краіна павінна авалодаць. Вынікі працы плануецца прадставіць цягам 120 дзён.
Раней Маск ужо працаваў у адміністрацыі Дональда Трампа. У 2024 годзе ён падтрымаў Трампа падчас прэзідэнцкай кампаніі, а пасля яго вяртання ў Белы дом узначаліў Дэпартамент павышэння эфектыўнасці дзяржаўнага кіравання DOGE. Пад яго кіраўніцтвам у федэральных ведамствах ЗША прайшлі маштабныя скарачэнні. У маі 2025 года Маск пакінуў гэтую пасаду.
Кампаніі Маска ўжо маюць шчыльныя сувязі з Пентагонам. SpaceX з'яўляецца адным з ключавых падрадчыкаў амерыканскага абароннага ведамства і стварае спадарожнікавыя сеткі для планаванага адміністрацыяй Трампа супрацьракетнага шчыта Golden Dome («Залаты купал»). Кампанія Маска ў сферы штучнага інтэлекту xAI сёлета таксама ўклала пагадненне, якое дазваляе амерыканскім вайскоўцам выкарыстоўваць чат-бот Grok у закрытых інфармацыйных сістэмах.
Пасля прэзідэнцкіх выбараў 2024 года адносіны Маска і Трампа істотна пагоршыліся праз супярэчнасці вакол законапраекта аб дзяржаўных выдатках. Аднак пазней яны памірыліся, і Маск зноў стаў часта з'яўляцца ў Белым доме, хоць ужо не настолькі рэгулярна, як у першыя месяцы новай адміністрацыі.
29 верасня Маск сядзеў побач з Трампам на працоўным абедзе з кіраўнікамі кампаній у сферы штучнага інтэлекту. Там ён разам з іншымі прадстаўнікамі індустрыі падпісаў добраахвотнае пагадненне аб бяспецы ШІ, якое Трамп назваў «маральна абавязковым».
На мінулым тыдні Маск таксама прысутнічаў на дзяржаўнай вячэры Трампа ў гонар старшыні КНР Сі Дзіньпіна. У маі ён лётаў у Пекін на борце прэзідэнцкага самалёта Air Force One у складзе бізнэс-дэлегацыі, якая суправаджала Трампа падчас дзяржаўнага візіту ў Кітай.
Адначасова Маск аднавіў значныя фінансавыя ахвяраванні ў падтрымку рэспубліканцаў. Паводле зводных звестак Федэральнай выбарчай камісіі ЗША, падчас выбараў 2024 года ён выдаткаваў больш за 250 мільёнаў даляраў на падтрымку Трампа і іншых рэспубліканцаў, а да лістападаўскіх прамежкавых выбараў ужо пералічыў не менш за 90 мільёнаў даляраў.
Starship Ілана Маска ўпершыню выйшаў на арбіту Зямлі
Трамп заявіў, што ў ЗША створаць «Сілы ШІ» і прызначаць адказнага за развіццё штучнага інтэлекту
«Мы не ведаем, як дабіцца алайнмэнту такіх сістэм». Размовы пра пагрозы ШІ — змова OpenAI, Google і Anthropic?
«Гуляйце ў відэагульні або будзеце тупымі!» Што за даследаванне працы мозгу так усхвалявала Ілана Маска
Цяпер чытаюць
Студэнтак беларускіх ВНУ абавязалі тэрмінова запоўніць анкету з пазначэннем свайго росту74
Каментары