Пенсіянерка з Мастоў аддала махлярам 110 тысяч рублёў і ўласную машыну
Тэлефонныя аферысты амаль тыдзень трымалі 65‑гадовую жанчыну на сувязі, запужваючы наркатычнымі грашыма і крымінальнай адказнасцю. У выніку пацярпелая не толькі спустошыла хатнія схованкі, але і прадала аўтамабіль.
Схема пачалася з традыцыйнага званка нібыта з пошты 2 красавіка: «Вам прыйшла пасылка, паведаміце нумар з Viber».
Ужо праз паўгадзіны ў гульню ўступілі «спецыялісты» Камітэта дзяржкантролю. Легенда была такой: ад імя пенсіянеркі адкрыты рахункі для адмывання грошай, атрыманых ад прастытуцыі і продажу наркотыкаў. Каб пазбегнуць турмы, наяўныя грошы трэба было тэрмінова задэклараваць.
«Яны не пакідалі мяне ў спакоі ні на хвіліну. Тэлефон увесь час быў на сувязі ў Viber, мне забаранялі яго адключаць, каб я нікому нічога не паведаміла і ні з кім не размаўляла», — згадвае жанчына.
Пад гэтым прэсінгам жанчына аддала першую частку грошай кур'еру, які прадставіўся супрацоўнікам разліковага цэнтра Нацбанка.
На гэтым аферысты не спыніліся. На наступны дзень ёй паведамілі, што яе машына выстаўлена на таргі, і яе трэба прадаць, а грошы зноў жа «задэклараваць». Жанчына выканала і гэта, перадаўшы злачынцам усю атрыманую суму. Так яна страціла каля 110 тысяч беларускіх рублёў.
У сераду махляры абяцалі, што а 16:00 да яе прыедзе прадстаўнік дзяржкантролю, верне і грошы, і машыну. Калі ж тэлефон «куратараў» быў пастаянна занятым, а абяцаная дэлегацыя не з'явілася, пенсіянерка зразумела: яе абакралі.
Міліцыя затрымала кур'ера, які забіраў грошы, але тыя сышлі далей па крымінальным ланцужку.
Цяпер чытаюць
Брат беларускай каралевы прыгажосці трапіў у рэанімацыю ў Азербайджане4
Каментары