На беларускія экраны вярнулася інтэлектуальная гульня «Брэйн-рынг»
Першая праграма выйшла на АНТ у мінулую нядзелю.
Шоу, як і 10 гадоў таму, вядзе Леанід Купрыда. У гэтым сезоне будзе разыгрывацца моладзевы кубак АНТ.
У першай гульні бралі ўдзел каманды: каманда Салігорска, каманда Гомельскага дзяржаўнага ўніверсітэта, каманда Мінскага дзяржаўнага палаца дзяцей і моладзі, каманда аграэкатурысцкага комплексу «Белы лось» з Лагойска.
Першы выпуск «Брэйн-рынгу» выйшаў у эфір 18 мая 1990 года на Першай праграме Цэнтральнага тэлебачання СССР. Ідэя інтэлектуальнай гульні — аналага «Што? Дзе? Калі?», але з дзвюма камандамі знаўцаў па шэсць чалавек у камандзе, — нарадзілася ў аўтара «Што? Дзе? Калі?» Уладзіміра Варашылава.
Аўтарам і рэжысёрам-пастанаўшчыкам быў Барыс Крук, які зараз вядзе маскоўскае «Што? Дзе? Калі?», а Уладзімір Варашылаў правёў першы цыкл з сямі перадач. Потым у Маскве шоу вёў Андрэй Казлоў.
У гульні ўдзельнічаюць дзве каманды па шэсць чалавек, першапачаткова на абмеркаванне пытання давалася хвіліна — 60 секунд. Пазней гэты час скарацілі да 20 секунд.
Але вельмі часта адказ даецца імгненна, галоўнае — першым націснуць на кнопку.
Як і «Што? Дзе? Калі?», «Брэйн-рынг» не толькі гулялі на тэлебачанні, але і як спартыўны варыянт, то-бок у інтэлектуальных клубах у розных краінах і гарадах, у тым ліку ў Беларусі. У Мінску, напрыклад, з сярэдзіны 1990-х.
На беларускім тэлебачанні «Брэйн-рынг» упершыню выйшаў у 2010 годзе. Ён паказваўся на АНТ і вядучым быў Леанід Купрыда.
Каментары
Параўнаю са штучным інтэлектам. Гульцы апрацавалі, прачыталі велізарныя памеры тэкстаў, таму ведаюць шмат фактаў. А калі не ведаюць нешта, то могуць версіяй (галюцынацыяй) трапіць у ісціну.
Аднак дагэтуль ёсць праблемы з "узгадненнем" (alignment) да чалавечых каштоўнасцей.