У Сяргея Лаўрова няма адчування, што Лукашэнка прамяняў Расію на «прабачэнне Еўропы»
«Беларускія войскі, падраздзялення беларускіх вайскоўцаў прымуць удзел у парадзе 9 мая, таму можна не перажываць, — заявіў міністр замежных спраў Расіі ў інтэрв'ю расійскім радыёстанцыям. — На гэтую тэму ўжо выказалася адміністрацыя прэзідэнта, Аляксандр Рыгоравіч будзе тут 8 мая, возьме ўдзел у серыі мерапрыемстваў, якія запланаваны ў гэты дзень, а затым, як ён сам абвясціў, ён паедзе прымаць парад у сябе. Беларускія вайскоўцы будуць удзельнічаць разам з вайскоўцамі цэлага шэрагу іншых краін і не толькі краін СНД на парадзе 9 мая», — сказаў Лаўроў.
Сяргей Лаўроў заявіў, што Расія «не зацікаўленая, каб крызіс у адносінах з Захадам працягваўся».
Таксама міністр заявіў, што Украіна павінна заставацца адзінай. Гэта ён заявіў у адказ на першае ж пытанне, чаму Расія не прызнае Наваросіі. «Мы хочам, каб на Украіне быў мір і спакой. Для гэтага трэба захаваць Украіну адзінай, не дазволіць расцягнуць яе па кавалках, а такія настроі ўжо выказваюцца дзе-нідзе ў Еўропе, якія саступілі ў свой час па выніках Другой сусветнай вайны частку сваіх тэрыторый ўкраінскай цяперашняй дзяржаве, і там жывуць меншасці», — падкрэсліў кіраўнік МЗС.
У 2014 годзе Расія спрабавала адарваць поўдзень Украіны пад лозунгам так званай «Наваросіі», але расійскім сілам удалося заняць толькі уўсход Данбаса і Крым.
Мінскія дамоўленасці Лаўроў назваў «найлепшым варыянтам кампрамісу». Ён «не ўпэўнены, што перамовы прайшлі б так паспяхова, калі б у іх браў удзел Барак Абама». Лаўроў заявіў, што ЗША перашкаджаюць «адкрытаму партнёрству Расіі і Германіі».
На пытанне кіраўніцы «Russia today» адносна Абамы ён сказаў: «Я не хацеў бы пераходзіць на асобы, але было шмат надзей, была і Нобелеўская прэмія міру, вядома ж, але і следам за гэтым было шмат войнаў, прычым войнаў абсалютна нелагічных, якія не адпавядалі інтарэсам стабільнасці ў адпаведных рэгіёнах», — падкрэсліў кіраўнік МЗС Расіі.
«Абама абяцаў Пуціну паўплываць на ўкраінскую апазіцыю, а на наступны дзень адбыўся дзяржпераварот», — заявіў кіраўнік МЗС Расіі. «Пасля таго, як адбыўся пераварот, ніхто нам не патэлефанаваў, каб хаця б сказаць, што, маўляў, не ўдалося», — дадаў ён.
Лаўроў заверыў, што Расія не будзе будаваць абаронны саюз з Іранам. Пасля пастаўкі Тэгерану расійскіх С-300, тыя, хто хоча ударыць па Іране, падумаюць двойчы, заявіў Лаўроў.
Галоўным ворагам Расіі на сёння Сяргей Лаўроў назваў Ісламскую дзяржаву. Ён прызнаў, што ў ёй ваююць сотні грамадзян Расіі.
Пры гэтым ён назваў адзінай пагрозай Расіі глабальную сістэму проціракетнай абароны, якую выбудоўваюць ЗША.
Каментары