Kali b da nas u dziasiatych dniach kastryčnika zavitali inšaplanetniki, to musova nazvali b abjekt svaich nazirańniaŭ planetaj Doždž. Navalny, amal niesupynny doždž apanavaŭ Homiel. Jon staŭ najlepšym kantraloram dobraŭparadkavanaści haradzkich darohaŭ i damoŭ. Panavańnie vady.
Nia tolki ŭ kaluhach i vyboinach, ale i prosta na asfalcie, jaki daŭno kładuć u taki fajny sposab, što źniknuć vilhaci ź jaho byvaje duža składana. Pahatoŭ kolkaść liŭniovak nievierahodna skaraciłasia. Voś i zastajecca spadziavacca na sonca.
A ŭ damoch, asabliva šmatpaviarchovych, apošnija daždžy naahuł strachu narabili. Ciače praktyčna na lubym paviersie — z padvakońniaŭ i ścienaŭ. Vada znachodzić najmienšyja niedarobki niadbałych budaŭnikoŭ. Źjaŭlajecca ćvil, ź jakoj ludzi zmahajucca jak mohuć. Adny ćvierdziać, što suprać hetaha nasłańnia dapamahaje marhancoŭka, inšyja prapanujuć apracoŭvać zaćviłyja ścieny farmalinam. Brośniu, moža, i pieramožaš, ale jak pieramahčy raskoliny, što jduć praz calutki šasnaccacipaviarchovik? Žančyny płačuć.
Miž tym mas-medyja havorać nam pra “Čystaje nieba” na susiedniaj Bieraściejščynie. Vučeńni z udziełam zvolnienych u zapas. Praktyka ŭzajemadziejańnia cyvilnych i vajskovych orhanaŭ na vypadak vajny. Pryviadzieńnie harnizonaŭ u bajavuju hatovaść. Słuchaješ i dzivuješsia ŭsioj henaj bravadzie. Ty ŭ pryncypie za mocnuju biełaruskuju armiju, ale navošta nam saviecki cyrk? Adzin znajomiec, što niadaŭna pryjšoŭ na “dembel”, uvohule źbiantežyŭ. Apošni hod im daŭdonili pra zusim inšuju taktyku vajny ŭ biełaruskich umovach. Nijakich razhortvańniaŭ vajskovych čaściej — u kožny rajon horadu, jak na toj vosieński kirmaš, musić prybyć kolki KamAZaŭ, naładavanych “kałašami” i bojezapasami da ich. Dabro heta razdaduć na ruki žycharam. I ŭsio. Jak prychodzili k nam partyzany...
Što da bieraściejskich maneŭraŭ, dyk vielmi cikavić rola ŭ ich unutranych vojskaŭ. Hałoŭnaja ich zadača ŭ vypadku vajennych dziejańniaŭ — vyvad źniavolenych u hłyboki tył albo rasstreł, kali mahčymaści dla vyvadu nia budzie. Voś takija viasiołyja karcinki. Śmiašniejšyja navat za toje, što Dzień nastaŭnika sioleta łob ab łob sutyknuŭsia z Dniom abarony žyviołaŭ.
Siarhiej Bałachonaŭ, Homiel
Ciapier čytajuć
Marata Markava pierasunuli z pasady ministra infarmacyi ŭ ministry kultury26
Kamientary