Plany idealahičnaha rostu

Plany idealahičnaha rostu

Biełaruskim uładam mała statystyki ekanamičnaha rostu, im chočacca taksama idealahičnaha roskvitu. Dziela chutčejšaha afarmleńnia biełaruskaj nacyjanalnaj idei, nad jakoj užo nia pieršy hod bjucca biełaruskija ŭłady, Łukašenka daručyŭ Michaiłu Miaśnikoviču raspracavać teoryju biełaruskaj ekanomiki novaha ŭkładu. “Biełaruski šlach” maje prava na isnavańnie, bo, na dumku kiraŭnika dziaržavy, Biełaruś paśpiachova pieraadoleła kryzysnyja tendencyi ŭ ekanomicy.

Biełaruskaja ekanamičnaja idealohija budzie mieć niekalki asablivaściaŭ. Pieršaja ź ich — “mocnaja i efektyŭnaja dziaržaŭnaja ŭłada”. Pakazalna, što na pieršaje miesca pastaŭlena słova “mocnaja”. Niahledziačy na ŭnušalnyja na papiery tempy ekanamičnaha rostu, Łukašenka ŭpeŭnieny, što liberalizacyja biaz mocnaj uładnaj vertykali tolki razbeścić hramadztva. Tamu dziaržava źbirajecca ŭmiešvacca va ŭsio, navat u “padzieł ćvikoŭ”. Źviazana heta z druhoj asablivaściu biełaruskaha šlachu — “pryvatny sektar moža i pavinien raźvivacca razam ź dziaržaŭnym, ale nie na škodu nacyjanalnym intaresam”. Tolki z pryvatnaha sektaru možna čakać pavieličeńnia abjomu padatkovych vypłataŭ. Niajnačaj, mienavita dalikatnaje razumieńnie nacyjanalnych intaresaŭ pryviało sioleta da ŭźniknieńnia biudžetnych prablemaŭ: za dva miesiacy hetaha hodu prahnoznyja pakaźniki pa biudžecie vykananyja nie byli — z-za niedachopu pastupleńniaŭ u miascovyja biudžety.

Treciaja asablivaść — “Pryvatyzacyja — nie samameta, a srodak znajści zacikaŭlenaha investara”. U aŭtorak było abjaŭlena, što praces pryvatyzacyi naftachimičnaha kompleksu ŭstupiŭ ŭ apošniuju fazu. Tak, da 15 krasavika pavinny być akcyjanavanyja navapołacki “Palimir”, haradzienski “Azot”, śvietłahorskaje “Chimvałakno”, babrujskaja “Biełšyna”, da 1 traŭnia — navapołacki “Naftan” i mahiloŭskaje “Chimvałakno”, da 1 žniŭnia — haradzienskaje “Chimvałakno”. Da kanca hodu ŭłady spadziajucca na značnyja investycyi. Možna nie sumniavacca, što jany buduć. Pryvatyzacyja stratehičnych pradpryjemstvaŭ zastałasia apošnim dziejsnym kozyram biełaruskich uładaŭ, dziakujučy jakomu jany pakul mohuć dyktavać svaje ŭmovy. Navat “Bałtyka”, jakaja źviarnułasia ŭ mižnarodny kamercyjny arbitražny sud pry rasiejskaj Handlova-pramysłovaj pałacie z pazovam suprać “Krynicy”, urešcie pieradumała adklikać svaje investycyjnyja srodki.

Kali na svaim poli biełaruskija ŭłady jašče mohuć niešta dyktavać, dyk na čužym vymušanyja sastupać. Niahledziačy na jašče adzin pryjarytet — “raźvićcio intehracyjnych stasunkaŭ z Rasiejaj” — adstojvać svaje intaresy biełaruskim uładam robicca ŭsio ciažej. Pa słovach ministra finansaŭ Mikałaja Korbuta, naša kraina stračvaje dziasiatki miljonaŭ dalaraŭ z-za ŭnifikacyi biełaruskaha padatkovaha zakanadaŭstva z rasiejskim. Tamu pakul tak i nie ŭdajecca damovicca ab adzinaj formie spahnańnia ŭskosnych padatkaŭ. Biełaruś praciahvaje nastojvać na bolš vyhadnym dla siabie varyjancie. Premjer Navicki spadziajecca dabicca kampensacyi za straty, jakija paniasie naša kraina. Biełaruski bok choča atrymać jaje ŭžo sioleta, rasiejcy ž źbirajucca płacić tolki ŭ 2005-m.

Vystupajučy na seminary kiraŭnikoŭ respublikanskich i miascovych orhanaŭ ułady, Łukašenka paskardziŭsia na adsutnaść naležnych ideolahaŭ, zdolnych abhruntavać pieraŭtvareńni apošnich hadoŭ. Padobna na toje, što rabić heta, jak zaŭždy, daviadziecca jamu samomu.

Valancin Paŭłoŭski