«Tut jašče pavinny dapłačvać». Biełarusy ŭ šoku ad hatela ŭ Siańnie ź vidam na rajvykankam
Niekatoryja nie pavieryli, što ŭ Biełarusi jašče moža być taki hatel. Inšyja pisali, što treba radavacca tamu, što ŭ Siańnie naohuł jość hatel.
Biełaruska apublikavała ŭ TikTok ahlad numara ŭ hateli ŭ Siańnie, zaŭvažyła BGmedia. «Jak dumajecie, kolki noč kaštuje? Numar u hateli Sianno. Zatoje vid z akna na pryhožy horad. Hodna)?» — padpisała jana rolik.
Miarkujučy z kadraŭ, siarod plusaŭ tolki vid na budynak miascovaha rajvykankama. Usio astatniaje nahadvała albo dekaracyi da savieckaha filma, albo film žachaŭ.
U kamientarach niekatoryja biełarusy nie pavieryli, što ŭ našaj krainie moža być taki hatel. Inšyja ž pisali, što treba radavacca tamu, što ŭ Siańnie naohuł jość hatel.
«Choć niechta heta pakazaŭ. Adzin tolki luks bolš-mienš. Ale tudy zvyčajnym ludziam niama dostupu».
«Tut jašče pavinny dapłačvać».
«Vy čakali ŭ Siańnie hatel 5 zorak? Dobra, što jość choć 1 zorka, heta nie kurort, a dla kamandziroŭki sydzie».
«Kali b byŭ pryvatny, daŭno b užo štrafami abkłali ci zakryli!»
Na inviestpartale ŭładaŭ Biełarusi jość paviedamleńnie, što ŽKH Sianna hatova pradać hatel za 150 tysiač dalaraŭ.
Darečy, hety hatel zhadvajuć nie ŭpieršyniu. Uletku 2025 hoda błohier Pavieł Parmon načavaŭ u najhoršych hatelach Biełarusi i dzialiŭsia ŭražańniami. Byŭ jon u tym liku i ŭ Siańnie.
Numar sapraŭdy ŭraziŭ chłopca. U tualecie ŭsio było nastolki ścipła, što składana znajści słovy dla apisańnia. Pad stollu visieła prosta lampačka. Navat tualetnaj papiery paškadavali — pakinuli dla hościa nievialiki kavałačak. Raźviesialiła błohiera toje, što špinhalet na dźviarach u stratehična važnaje miesca jość z dvuch bakoŭ.
Zatoje i cana była śmiešnaj — krychu bolš za 20 rubloŭ za noč.
Kamientary