Barys Tumar. Hančaryk - Łukašenka – 26:29

 Hančaryk - Łukašenka – 26:29

Vyniki apytańnia hramadzkaje dumki, praviedzienaha na zamovu «NN»

30 lipienia — 1 žniŭnia sacyjalahičnaja słužba infarmacyjnaj kampanii BiełaPAN “Lustra” na zamovu našaj hazety apytała 500 mienčukoŭ ad 18 hadoŭ i starejšych. Ankietavańnie ładziłasia pa haradzkoj kvotnaj vybarcy (h.zn., što dola ludziej peŭnaha połu, vieku, z peŭnym uzroŭniem adukacyi siarod apytanych adpaviadała ichnamu pracentu ŭ nasielnictvie). Pamyłka vybarki mahła być tolki vielmi niaznačnaja — mienš za 1%.

Vyniki apytańnia — u tablicy sprava.

A.Łukašenka pa-raniejšamu zastajecca samym papularnym pretendentam, ale jahony rejtynh nie raście. U Miensku jon jak vahaŭsia ŭsie apošnija hady miž 25 i 30%, takim i zastajecca. Vidać, toje samaje i va ŭsioj krainie, adno što ahulnanacyjanalny rejtynh papularnaści A.Łukašenki zvyčajna vyšejšy za staličny niedzie na 15%.

U.Hančaryk za 10 dzion paśla abviaščeńnia jaho adzinym kandydatam ad šyrokaj antyłukašenkaŭskaj kaalicyi ryŭkom vyjšaŭ u Miensku na druhuju pazycyju paśla A.Łukašenki, skaraciŭšy adryŭ ad pieršaha prezydenta da minimumu. “Łejbł” adzinaha kandydata spracavaŭ. Ale j “niezaležnicka-demakratyčny” elektarat nia vyras. Jon jak składaŭ u Miensku 30—35%, tak i składaje. Možna mierkavać, što jon zastajecca stabilnym i ŭ cełym u krainie, tolki što tam jon na dziasiatak pracentaŭ nižejšy, čym u stalicy.

Cikava, što inšaje apytańnie, praviedzienaje “Lustram” na minułym tydni, pakazała: 24% mienčukoŭ ličać siłavyja struktury datyčnymi da šerahu hučnych palityčnych źniknieńniaŭ-zabojstvaŭ. Rychtyk ličba vybarcaŭ Hančaryka.

S.Domaš sastupaje Ŭ.Hančaryku ŭ Miensku niašmat, uličvajučy, što jon užo 10 dzion jak prypyniŭ ułasnuju kampaniju. Jašče macniejšyja pazycyi Domaša ŭ rehijonach. Nie tamu, što patencyjał davieru da jaho ŭ stalicy byŭ mienšy: prosta šmat u nas inšych demakratyčnych palitykaŭ, čyja papularnaść praktyčna abmiažoŭvajecca mienskaj kalcavoj darohaj. Hetak, hienerał Kazłoŭski sabraŭ u stalicy 36 tys. podpisaŭ z 79 tys. pryznanych sapraŭdnymi ahułam (usie ličby kolkaści podpisaŭ, pryznanych sapraŭdnymi, papiarednija, bo kančatkovyja stanuć viadomyja tolki na hetym tydni), biznesmen Ju.Dańkoŭ — 62 z 78 tys., pravasłaŭny S.Kałuhin — 57 z 94 tys., dyplamat M.Marynič — 70 z 95 tys., a ahrarnik A.Jarašuk — až 51 z 73 tys.! (Apošnija ličby ŭskosna śviedčać, što hetyja kandydaty karystalisia nie aby-jakoj padtrymkaj mienskaje vykanaŭčaje vertykali, a mo j Jarmošyna.). Za Z.Paźniaka ŭ Miensku padpisalisia 39 z 72 tys. va ŭsioj krainie. Paradaksalna, ale Domaš u stalicy zaniaŭ tolki 12-je miesca siarod kandydataŭ pa kolkaści sabranych podpisaŭ. Va ŭsich astatnich rehijonach jon byŭ abo druhi paśla Łukašenki (Horadnia, Homiel), abo treci (u Bieraści paśla Hančaryka, u Viciebsku paśla Hajdukieviča). U Miensku ž Domaš sabraŭ tolki 30 tys. podpisaŭ proci 31 tys. Čyhira, 42 tys. Hančaryka i h.d. Cikava, što praporcyja hałasoŭ, sabranych u Miensku za Domaša i Hančaryka, amal da dziasiataj doli adsotka paŭtaraje praporcyju miž ličbami ichnych rejtynhaŭ u apošnim apytańni. Pa-za stalicaj, asabliva na Haradzienščynie, dzie Domaš našmat apieradžaŭ Hančaryka pa papularnaści, jon, vidavočna, i ciapier zastajecca jašče papularnym. Heta pakaźnik i ŭdałaha vybaru kandydatury nie mienčuka Domaša, i jahonaje asabistaje sympatyčnaści, i dobraje arhanizavanaści vybarščykaŭ centrapravicy, jakija za im stajać. Vidać, hetaja palityčnaja siła maje dobruju paślavybarčuju perspektyvu.

Hałasy sympatykaŭ Domaša ŭ vypadku jahonaha niaŭdziełu raźmiarkoŭvajucca nastupnym čynam: pakul tolki pałova ź ich (6,9%) hatovaja pieradać hałasy adzinamu kandydatu ad “piaciorki”. 1,7% — h.zn., trochi bolš za dziasiatuju častku, pierachodziać da Łukašenki. Vidać, tyja, chto abo nia lubić prafsajuzaŭ, abo addaje pieravahu maładziejšamu (ci “macniejšamu” kandydatu). 1% hałasoŭ Domaša pierabiahaje da Hajdukieviča — tyja, chto nia choča hałasavać za ciapierašniuju ŭładu, ale j nie za Hančaryka; i prykładna treciaja častka prychilnikaŭ Domaša vahajecca ŭ vybary.

U S.Hajdukieviča šancaŭ na pieramohu mała. Razmytaść pazycyi — ni za, ni suprać Łukašenki — zabiaśpiečvaje harantavanuju žmieniu hałasoŭ, ale ŭ sytuacyi, kali kraina raskołataja jakraz u asabistym staŭleńni da pieršaha prezydenta, liberał-demakrat źbiraje nia bolš za 10%. Na hetych vybarach zmahacca budzie nie Hajdukievič, zmahacca buduć za Hajdukieviča: chto ŭrešcie pieraciahnie jahonyja hałasy.

Sinicyn, jaki ŭsio jašče damahajecca rehistracyi, zastajecca aŭtsajderam. I heta ŭ Miensku, dzie jon sabraŭ ilvinuju dolu podpisaŭ i dzie jaho aktyŭna reklamavali FM-stancyi (z 83 tys. podpisaŭ, pryznanych sapraŭdnymi, na Miensk u jaho prychodzicca 38 tys., tady jak u Hančaryka – 42 z 119 tys., u Domaša – 30 z 159 tys., u Hajdukieviča – 32 z 130 tys., u Łukašenki – 64 z 392 tys.). Biada Sinicyna i Hajdukieviča — ichnaja niecharyzmatyčnaść.

Z usiaho hetaha vidać, što Hančaryk užo mabilizavaŭ bolšaść demakratyčnych vybarcaŭ, ale značnaja častka domašaŭcaŭ jašče vahajecca.

Miž tym, kala čverci biełarusaŭ uvohule nia vyznačylisia z svaimi palityčnymi sympatyjami. Kala 10% nia vyrašyli, ci pojduć na hetyja vybary. Pad 15% viedajuć, što pojduć, ale nie ŭjaŭlajuć, za kaho hałasavać. Im i Łukašenka nia luby, i apazycyja nie pryvabnaja. Baraćba ŭ apošni miesiac prezydenckaje honki pojdzie za hetaje «bałota». Jaje specyfika ŭ tym, što hetaja častka nasielnictva apalityčnaja, i ni hučnyja skandały, ni pytańni dziaržaŭnaha ŭładkavańnia jaje nie cikaviać.

U Hančaryka zadača składaniejšaja, čym u Łukašenki. Bo ž jamu pryjdziecca vieści zmahańnie nia tolki za apalityčnuju častku vybarščykaŭ, ale i za tuju častku śviadomych antyłukašenkaŭcaŭ, jakija dahetul sumniajucca ŭ samim Hančaryku.

Barys Tumar