Homielski milicyjant staŭ absalutnym čempijonam śvietu pa bodybiłdynhu

Siarhiej Matusievič — supracoŭnik śpiecpadraździaleńnia homielskaha pałka PPSM UUS Homielskaha abłvykankama — atrymaŭ pieramohu na čempijanacie śvietu pa bodybiłdynhu i fitnesu pavodle viersii fiederacyi NAC.

Na druhim miescy — małodšy brat čempijona Raman Kulčyk, jaki pracuje ŭ paŭsiadzionnym žyćci taksistam.

Čempijanat, udzieł u jakim brali bodybiłdary ź dzieviaci krain śvietu, prachodziŭ u Kazani. U katehoryi «Atletic-1» (rost zvyš 175 sm) na pieramohu pretendavali 15 čałaviek. Najlepšym žury pryznała biełarusa Siarhieja Matusieviča, druhim staŭ jaho brat Raman.

Paśla pieramohi ŭ svajoj katehoryi Siarhiej zmahaŭsia za zvańnie absalutnaha čempijona z sapiernikam z Hiermanii, jaki, darečy, byŭ trecim na čempijanacie siarod prafiesijanałaŭ. Ale hetym razam sudździ addali pieravahu hamielčuku, jaki ŭ vyniku staŭ uładalnikam prestyžnaha tytuła i adrazu dvuch kubkaŭ. Pryzavych fondaŭ na bolšaści spabornictvaŭ pa kulturyźmie, na žal, niama. I navat rychtavacca da turniraŭ, a taksama ŭdzielničać u ich biełaruskim spartoŭcam čaściej za ŭsio davodzicca za svaje hrošy. U pryvatnaści, hety čempijanat, sa słovaŭ Siarhieja Matusieviča, abyšoŭsia jamu ŭ sumu, ekvivalentnuju amal 2000 dalaraŭ. Niatanna abyšlisia i papiarednija spabornictvy — majski čempijanat Jeŭropy, na jakim hamialčuk zaniaŭ druhoje miesca. A adzinym «hienieralnym sponsaram», śmiajecca spartoviec, vystupaje jaho maci Natalla Jurjeŭna — buchhałtar kamiercyjnaj struktury.

Zrešty, hrošy — tolki «instrumient». Našmat bolšych, časam niečałaviečych vysiłkaŭ patrabuje treniravalna-padrychtoŭčy praces, pryviadzieńnie siabie ŭ formu. Dastatkova skazać, što, rychtujučysia da vystupu, Siarhiej za šeść tydniaŭ skinuŭ 14 kiłahramaŭ. Pryčym apošnija 4 daviałosia «zhaniać» litaralna za paŭtara dnia.

Zajmacca bodybiłdynham Siarhiej pačaŭ u 1995 hodzie, kali hety vid sportu ŭ Biełarusi pieražyvaŭ svoj roskvit, jaki skončyŭsia, na žal, razam ź dzievianostymi. Ale, zrazumieła, nie dla tych, dla kaho «ciahać žaleza» i ź juvielirnaj dbajnaściu šlifavać kožnuju ciahlicu, daŭno stała stylem žyćcia. Darečy, u najbližejšych płanach 34-hadovaha atleta — pastupleńnie ŭ mahistraturu skončanaha raniej Homielskaha dziaržaŭnaha ŭniviersiteta imia F. Skaryny i napisańnie navukovaj pracy na temu «Płanavańnie trenirovačnaha pracesu pry padrychtoŭcy da spabornictvaŭ pa bodybiłdynhu».

• 0
• 0
• 0
• 0
• 0
• 0
• 0
• 0