Pieršy siarod zachodnich: «Kommiersant» pra padrabiaznaści vizitu Pucina

Učora pozna viečaram u rezidencyi Zasłaŭje pad Minskam sustrelisia prezidenty Biełarusi i Rasii Alaksandr Łukašenka i Uładzimir Pucin. Śpiecyjalny karespandent «Kommiersanta» Andrej Kaleśnikaŭ vyśvietliŭ, čamu Uładzimir Pucin addaŭ pieravahu Biełarusi pierad Kazachstanam u jakaści pieršaj krainy, jakuju jon naviedaŭ jak prezident.

Kursanty roty hanarovaj varty biełaruskaha prezidenta vyhladali tak, niby sustrakać pavinnyja byli nie jany, a ich.

Miž tym kamandzir roty, raskazaŭšy, što chłopcy ŭ ich adzin da adnaho, rostu nie nižejšaha (ale i nie vyšejšaha) za 185 santymietraŭ (roŭnieńkija, jak biełaruskija ahurki ŭ znakamitych škłoŭskich ciaplicach), a ściahanosiec — dyk usie 195 santymietraŭ (a razam sa ściaham — lepš naohuł nie dumać).

— Škada, — uzdychnuŭ kamandzir roty, — što my nie dajechali na vaš konkurs u Maskvie (nie tak daŭno ŭ stalicy našaj Radzimy sapraŭdy prachodziŭ ahlad-konkurs rot hanarovaj varty niekalkich krain). Druhoje miesca tam było b nie dla nas.

Toje ž, mabyć, datyčyć i prezidenta Biełarusi Alaksandra Łukašenki.

Jon sustreŭ Uładzimira Pucina la trapa samalota, pa-baćkoŭsku abniaŭšy jaho (usio ž taki spadar Łukašenka, u adroźnieńnie ad spadara Pucina, nie prapuściŭ nivodnaha prezidenckaha terminu),

Paśla hetaha kartež nakiravaŭsia ŭ rezidencyju. Kažuć, što pa darozie na adnym z mastoŭ niekatory čas visieła raściažka chulihanskaha źmiestu, ale pakolki Uładzimir Pucin spaźniaŭsia, to biełaruskija śpiecsłužby svoječasova likvidavali hetuju pahrozu (u asnoŭnym — nastroju rasijskaha prezidenta).

Alaksandr Łukašenka, vidavočna pamažnieły ŭ apošni čas (moža, paviesiŭ kańki na ćvik, u adroźnieńnie ad spadara Pucina, jaki źniaŭ ich ź ćvika), vyhladaŭ vielmi žyćciaradasna.

Mahčyma, heta było źviazana z tym, što ciapier jamu bolš nie daviadziecca sutykacca na sustrečach najvyšejšaha ŭzroŭniu z užo byłym pamočnikam prezidenta Rasii Siarhiejem Prychodźkam, ź jakim u jaho była luboŭ takoj uzajemnaj siły, što krok da ŭzajemnaj nianaviści byŭ zrobleny šmat hadoŭ tamu.

Zrešty, jość padazreńnie, što ad pieramieny pamočnikaŭ suma adnosin u palitycy nie mianiajecca.

Viačernija padziei adbyvalisia ŭ rezidencyi Zasłaŭje. Dvuchbakovaja sustreča prachodziła ŭ kabiniecie, usia mebla jakoha składałasia z dvuch siervantaŭ z tryma vazami. Interjer arhanična dapoŭnili dva prezidenty. Pramova Alaksandra Łukašenki nasiła fiłasofski charaktar. Jon paviedamiŭ, jak časta dumaje pra toje, chto zmoh dasiahnuć bolšaha ŭ spravie abjadnańnia, čym Biełaruś i Rasija.

— Nu chto? — pierapytaŭ jon, raźmiaściŭšysia ŭ fateli tak, što toj ciažka ŭzdychnuŭ: ź jaho niby vypuścili paru. Da taho ž Alaksandr Łukašenka čas ad času zakładvaŭ pravuju ruku pad łackan pinžaka, što, mahčyma, nadavała jamu i jaho słovam lišniuju vahu.

— U nas niama miežaŭ (u Jeŭrasajuzie taksama, naprykład. — A.K.), — skazaŭ spadar Łukašenka. — U nas adzinaja mytnaja prastora (jak i ŭ ES. — A.K.), u nas praktyčna adzinaja ekanomika (i tut u paraŭnańni ź ES niama čym hanarycca. — A.K.), u nas adzinaja abaronnaja vytvorčaść (u ES tolki jašče budzie, u hetym Rasija i Biełaruś nasamreč abyšli ES, pryčym jašče ŭ saviecki čas. — A.K.).

— I mnohija inšyja rečy, — udakładniŭ prezident Biełarusi.

Prezident Rasii zhadziŭsia i z hetym.

— Da nas mnohija pryhladajucca siońnia, — praciahnuŭ prezident Biełarusi. — Ukraincy pačali hladzieć! Robiać nam zaŭvahi, ale ž byŭ prezident Ukrainy na apošnim našym pasiedžańni ŭ Maskvie!

— Heta pieršaja maja pajezdka za miežy Rasijskaj Fiederacyi, — u svaju čarhu skazaŭ spadar Pucin. — Biełaruś — asablivy naš partnior.

Ja spytaŭ potym u pamočnika Uładzimira Pucina spadara Ušakova, čamu ž usio-taki Biełaruś stała pieršaj.

— Vy majecie na ŭvazie, — pierapytaŭ jon, — čamu nie Kazachstan, a Biełaruś? Bo vy ž heta majecie na ŭvazie? Sapraŭdy, pra heta apošnim časam havorać. Ale viedajecie, u nas i vybaru asablivaha nie było. Zahadzia vyznačanaja była data samita ŠOS u Kitai, paśla jaho łahična zajechać u Astanu. Akramia taho, damovilisia pra pajezdku ŭ zachodnim kirunku, damovilisia z Hiermanijaj, z Francyjaj. Łahična, što Biełaruś stała ŭ hetaj situacyi pieršaj.

Ale tolki ŭčora i tolki na adzin viečar.

• 0
• 0
• 0
• 0
• 0
• 0
• 0
• 0