Pachaładańnie, na jakim možna pahreć ruki

Biełaruskamu kiraŭnictvu nie adnojčy dzika šancavała. Mienavita dzika. U tym sensie, pra jaki rasiejcy kažuć: "Komu vojna, a komu mať rodna".

To terakty ŭ Ńju-Jorku prymušajuć śviet zabycca na čarhovyja tutejšyja vybary, to Besłan stanovicca zručnym kantekstam dla abviaščeńnia referendumu, to elektaralnaja sieča na Ŭkrainie adciahvaje ŭvahu ad jašče adnoj "elehantnaj pieramohi"...

I voś ciapier Pucin biesprecedentna žorstkaj antyzachodniaj pramovaj ŭ Miunchienie prymusiŭ demakratyčny śviet zahamanić pra rymejk chałodnaje vajny.

Pavialičyć

Što padšturchoŭvaje kramloŭskaha kiraŭnika ŭ fazie "kulhavaj kački" kidać palčatku Vašynhtonu?

Chtości kaža, što rasiejskaja ŭłada kančatkova apjanieła ad kazačnaj naftahazavaj kanjunktury. Znoŭ krukam nosa nie dastanieš: enerhietyčnaja, bač, imperyja!

Inšyja miarkujuć, što Pucinu chočacca ŭvajści ŭ historyju adradžencam suśvietnaha statusu dziaržavy. Hladziecie, skončyłasia era postsavieckaha prynižeńnia, znoŭ usie bajacca Maskvy!

Jak by tam ni było, ale biełaruskija dziaržaŭnyja medyi, što apošnim časam tolki i "mačyli" Kreml, raptam pierajšli na pabłažlivaje palapvańnie Pucina pa plačy. Małajčyna, chłopiec, dapiaŭ narešcie da taho, što naš "baćka" praklamavaŭ uvieś čas! I videašerah: Łukašenka vykryvaje zahany adnapalarnaha śvietu z trybuny AAN.

Reakcyja biełaruskaha aficyjozu — vyrazny symptom taho, što novy kurs Kramla (kali heta sapraŭdy vyljecca ŭ doŭhaterminovuju liniju) lje vadu na młyn biełaruskich kiroŭnych viarchoŭ.

Čym vastrejšyja supiarečnaści miž Maskvoju dy Zachadam, tym lahčej na ich hulać aficyjnamu Miensku. Heta akurat adpaviadaje vybranaj im zaraz stratehii łaviravańnia miž centrami siły.

Plany Vašynhtonu razharnuć bazy supraćrakietnaj abarony ŭ Polščy i Čechii znoŭ padvyšajuć u vačoch maskoŭskich jastrabaŭ rolu Biełarusi jak farpostu.

Rasiejskija siabry Łukašenki peŭna ž buduć skarystoŭvać biełaruskuju kartu na vybarach u Dumu. Ci vypadkova zavitvali niadaŭna ŭ Miensk lider rasiejskich kamunistaŭ Ziuhanaŭ dy nacyjanał-patryjot Prachanaŭ? Apošni, nazvany jašče za savieckim časam "sałaŭjom hienštabu", napisaŭ potym vialiki patetyčny artykuł na temu: lepšaha ščyta, čym Biełaruś, dla nas niama!

U hetym kantekście možna kali nie da "sajuznaha budaŭnictva" viartacca, dyk va ŭsiakim razie padaić jašče rasiejski ŭrad. Zajelisia tam! Što, škada kaliva preferencyjaŭ dla samaachviarnych bratoŭ?

Karaciej, znoŭ možna pradavać Maskvie rytaryčnuju, mitalahizavanuju hatovaść biełarusaŭ kłaścisia pad tanki z Zachadu.

Viadoma, poŭnamaštabny rymejk chałodnaje vajny małaimavierny. Ale fakt toje, što na pachaładańni ŭ stasunkach miž suśvietnymi centrami siły tutejšaje kiraŭnictva moža pahreć ruki. Dyj na sercy ciaplej: jašče nia viečar!

• 0
• 0
• 0
• 0
• 0
• 0
• 0
• 0