Frankienštajn atrymlivaje patrojny ŭdar
Pieršy vice-premjer Siamaška zajaviŭ, što ŭ nastupnym hodzie Biełaruś budzie kuplać haz pa sto dalaraŭ. Piša Alaksandar Kłaskoŭski.
Tolki što pieršy vice-premjer Siamaška zajaviŭ, što ŭ nastupnym hodzie Biełaruś budzie kuplać haz pa sto dalaraŭ. Maskva ž za akcyi "Biełtranshazu" musić vykładać hrošy na bočku.
Zvyš taho, biełaruski bok udvaja ŭzdymaje taryf na tranzyt hazu.
Inšyja padrabiaznaści jašče nieviadomyja. Pradstaŭnik "Hazpromu" Kupryjanaŭ uvohule kaža, što pakul niama kantraktu, kazać pra damoŭlenaść zaŭčasna.
Adnak u pavietry patychaje ŭžo kampramisam, pra niepaźbiežnaść jakoha ćvierdzili eksperty. Pytańnie było tolki ŭ tym, ci dojdzie da hazavaj vajny i na jakich umovach budzie dasiahnuty hety kampramis.
Vyhladaje na toje, što bal-maskarad u adhaźnikach admianiajecca.
Adnak tryŭmfavać Miensku nie vypadaje.
Da ziamlanak mo' i nia dojdzie, ale ž i soładka naleta nia budzie.
Bo nasamreč "treba vieści havorku pra patrojny ŭdar pa biełaruskaj ekanomicy", tolki što skazaŭ mnie ŭ telefonnaj havorcy ekspert Jarasłaŭ Ramančuk. I što da nafty, dyk tut straty buduć, vierahodna, bolšyja, čym jak ad padaražeńnia hazu (jakoje, nie zabyvajma, budzie praciahvacca: $100 — heta tolki pačatak).
Navat kali pašencić damovicca pra padzieł mytaŭ 70:30 ci 50:50, biełaruski biudžet niedaličycca miljardnych sumaŭ ad prodažu naftapraduktaŭ.
Treci udar — rasiejski handlovy pratekcyjanizm, to bok usie hetyja cukrovyja, kandytarskija dy inšyja lakalnyja vojny, jakija naŭrad ci ścichnuć.
Tak što ajčynnyja načalniki dla ŭdumlivaha hramadzianina vyhladajuć zusim nie hierojami zmahańnia z enerhietyčnym imperyjalizmam, a niedalnabačnymi dziejačami, što nia zdoleli skarystać doŭhuju epochu naftahazavaj durnicy dziela ekanamičnaj transfarmacyi.
Pačałasia prahnazavanaja ekspertami epocha prodažu "familnaha srebra".
Maskva taksama, miakka kažučy, nie vyhladaje pryncypovaj baraćbitkaj suprać biełaruskaha režymu.
Voś zaraz hazpromaviec Kupryjanaŭ zajaŭlaje, što jany nakirujuć svaich naziralnikaŭ na "Jamał — Eŭropu" (kab tut, kali što, nia krali tranzytny haz).
Bač, jak pilnujuć svoj ekanamičny intares!
A čamu ž ad Rasiei nie było takich pilnych naziralnikaŭ na minułych vybarach? Kreml spadziavaŭsia na hiešeft?
Rasiejcy sami ŭzhadavali tutejšy režym. I ŭ pryvatnaści — vyrodlivuju, padsadžanuju na enerhietyčnuju ihołku ekanamičnuju madel.
Nu dyk čaho kryŭdavać zaraz na ŭłasnaručna stvoranaha Frankienštajna?
Ciapier čytajuć
U minskim zaaparku praviaduć fiestyval ahniu. Kažuć, što žyvioły buduć u pamiaškańniach, tamu ŭsio narmalna1
Kamientary