Za padpał dźviarej babrujskaha KDB anarchisty atrymali pa 7 hadoŭ strohaha režymu
U svaim apošnim słovie Jaŭhien Vaśkovič zajaviŭ, što nie škaduje ab tym, što ŭčyniŭ. Astatnija pakajalisia.
Sud Babrujsku i Babrujskaha rajona skončyŭ razhlad kryminalnaj spravy pa fakcie padpału miascovaha budynku KDB. Na Jaŭhiena Vaśkoviča, Paŭła Syramałotava i Arcioma Prakapienku, jakim inkryminavałasia złosnaje chulihanstva i sproba naniasieńnia škody majomaści ŭ asabliva vialikim pamiery, atrymali pa siem hadoŭ turmy strohaha režymu.
Sudovy praces prachodzić pad staršynstvam sudździ Paŭła Karkinina. Na siońniašnim pasiedžańni byli ahučanyja straty ad napadu padsudnych na budynak KDB. Jany skłali krychu bolej za 253 tysiačy rubloŭ. Hetuju sumu svajaki abvinavačanych užo vypłacili.
Adbylisia sprečki, i abvinavačanyja pačali vystupać z apošnim słovam.
Dziaržaŭnaja abvinavaŭca zajaviła, što vina padsudnych całkam dakazanaja. Dziejańni abvinavačvanych, na jaje dumku, mahli źniščyć uvieś budynak KDB z majomaściu ŭ im. Suma mierkavanych strataŭ acenienaja amal u dva miljardy rubloŭ. Pavodle jaje, hetuju sumu sud pavinien uličyć pry vyniasieńni vyraku.Vaśkoviča abvinavaŭca prapanavała asudzić na siem z pałovaj hadoŭ pazbaŭleńnia voli ŭ kałonii strohaha režymu. Syramałotava — na siem z pałovaj hadoŭ pazbaŭleńnia voli ŭ kałonii ŭzmocnienaha režymu. Prakapienku — na vosiem hadoŭ pazbaŭleńnia voli ŭ papraŭčaj kałonii ŭzmocnienaha režymu.
Advakaty padsudnych z pazicyjaj abvinavaŭcaŭ nie pahadzilisia. Jany prasili sud uličyć, što pakazańni abvinavačanyja davali pad ciskam. Akramia taho, jany nie mieli na mecie spalić budynak KDB, na što naciskaje abvinavaŭca, a tolki chacieli jaho paškodzić. Dovady abvinavaŭcy, davodzili advakaty, hruntujucca na mierkavańniach pra toje, što mahło b adbycca, ale nie adbyłosia. Kazali taksama pra prapahandyscki film Biełaruskaha telebačańnia pra napad padsudnych na budynak KDB, što ŭžo stvaryła adpaviednuju abstanoŭku. Prasili sud, kab vyrak byŭ abjektyŭny i suvymierny, nie źviazany z pazbaŭleńniem voli.
U svaim apošnim słovie Jaŭhien Vaśkovič zajaviŭ, što nie škaduje ab tym, što ŭčyniŭ. Jon nazvaŭ siabie lićvinam i dadaŭ, što
jaho śviaty abaviazak — baranić nacyjanalnyja biełaruskija kaštoŭnaści. Za ich ja ŭmierci hatovy, bo žyćcio karotkaje, a radzima viečnaja, kazaŭ chłopiec.Jaho nie spałochajuć ciažkaści, i jon z hodnaściu ich projdzie. Skončyŭ svoj karotki vystup Vaśkovič vokličam: "Žyvie Biełaruś!".
Arciom Prakapienka zajaviŭ, što škaduje ab učynienym i što ŭdzieł u napadzie na KDB byŭ pamyłkaj jaho žyćcia.
Pavał Syramałotaŭ taksama źviarnuŭsia da suda z prośbaj pra litaść i kab jamu pryznačyli pakarańnie nie źviazanaje z pazbaŭleńniem voli.
Paśla pierapynku byŭ abvieščany prysud:
usie abvinavačanyja atrymali pa siem hadoŭ turmy strohaha režymu.
Pa skančeńni pracesu advakaty paviedamili, što buduć abskardžvać vyrak Babrujskaha suda ŭ Mahiloŭskim abłasnym.
Na naradzie ŭ Łukašenki publična pasvarylisia čynoŭniki. Jon nie viedaŭ, kaho padtrymać15
Kamientary