Adkryćcio pomnika Lavonu Rydleŭskamu ŭ Łondanie

Adznačeńnie 90-ch uhodkaŭ Słuckaha zbrojnaha čyna ŭ Londanie prajšło pad znakam ušanavańnia pamiaci adnaho ź jaho udzielnikaŭ, pachavanaha na mohiłkach Hempsted Lavona Rydleŭskaha.

Lavon Rydleŭski — udzielnik Słuckaha zbrojnaha čyna i vybitny dziejač biełaruskaj dyjaspary. U čas paŭstańnia jamu było ŭsiaho 17 hod, jamu daviałosia paŭdzielničać u klučavych bajach ciaham toj sproby abaranić niezaležnaść Biełarusi. Paśla jaho Rydleŭski ŭdzielničaŭ u biełaruskaj niezaležnickaj partyzancy ŭ Polščy, zatym u rešcie rešt emihravaŭ u Francyju. Padčas Druhoj suśvietnaj vajny jon ŭdzielničaŭ u francuskim antyfašysckim supracivie.

Paśla vajny hety samaaddany čałaviek aktyŭna apiekvaŭsia losam tysiačaŭ biełarusaŭ, jakija apynulisia ŭ lahierach dla pieramieščanych asobaŭ pa ŭsioj Zachodniaj Eŭropie. Dziakujučy Rydleŭskamu šmatlikija biełarusy paźbiehnuli vysyłki ŭ SSSR, dzie ich nieminujuča čakali stalinskija lahiery. Dziela svaich ziemlakoŭ i dziela biełaruščyny hety čałaviek achviaravaŭ ułasnaj karjeraj i ŭłasnym zdaroŭjem.

Za paru tydniaŭ da svajoj śmierci Rydleŭski pryjechaŭ u Londan. Tut jon pamior i byŭ pachavany. Miesca jahonaha pachavańnia było zhublenaje i adšukanaje tolki niekalki hadoŭ tamu dziakujučy arhanizacyi «Biełaruskaja nacyjanalnaja pamiać» i historyku Natalli Hardzijency. Staroje nadmahille nie zachavałasia, i tamu było vyrašana adnavić jaho, što i było zroblena namahańniami členaŭ ZBVB. Uračystaje adkryćcio pomnika prymierkavali da 90-ch uhodkaŭ Słuckaha zbrojnaha čyna.

Prykładnaje miesca znachodzańnia mahiły Rydleŭskaha:

(taksama hladzi pa spasyłcy)

Paśla adkryćcia pomnika adbyłasia ŭračystaja impreza ŭ Biełaruskim domie. Z najcikavaj lekcyjaj pra historyju Słuckaha zbrojnaha čyna vystupiŭ Mikoła Pačkajeŭ, uspaminami pra Lavona Rydleŭskaha padzialilisia bačyŭšyja jaho Ivonka Surviłła i a. Alaksandar Nadsan.

***

Ad razumieńnia palityčnych abstavinaŭ nie pierastaje być mienš prykrym, što pamiaćciu hetkich zasłužanych biełarusaŭ, jak Ł. Rydleŭski, nie apiekvajecca dziaržava, što farmalna nazyvajecca Respublikaj Biełaruś.

Rada Biełaruskaj Narodnaj Respubliki budzie zapatrabavanaja i budzie mieć poŭnaje maralnaje prava nazyvacca orhnam, što pradstaŭlaje intaresy Biełarusi, jak minimum da taho času, pakul aficyjnyja mienskija ŭłady nie pierastanuć ihnaravać abjektyŭnyja zasłuhi ludziej pierad Biełaruśsiu i biełarusami, jak by tyja ludzi ni stavilisia da savieckaj ułady.

• 0
• 0
• 0
• 0
• 0
• 0
• 0
• 0