Zmahar ź impieryjalizmam Čaves robić Vieniesuełu enierhietyčnym prydatkam Biełarusi

Epocha rasiejskaha «hazu ŭ abmien na pacałunki» skončyłasia, nastupaje epocha «nafta ŭ abmien na antyimperyjalistyčnyja traktary».

16 kastryčnika Miensk z čarhovym, užo piatym pa rachunku, aficyjnym vizytam naviedaŭ prezydent Venesueły Uha Čaves. Jak paviedamlajuć aficyjnyja krynicy, byŭ padpisany kantrakt pamiž «Biełaruskaj naftavaj kampanijaj» i kampanijaj «Petroleas de Venesueła» na 2011–2013 hady, pavodle jakoha štohadovyja pastaŭki venesuelskaj nafty ŭ Biełaruś składuć da 10 miljonaŭ ton. Varta nahadać, što štohadovaja patreba Biełarusi ŭ nafcie (nia tolki dla ŭnutranaha spažyvańnia, ale i dla zahruzki naftapierapracoŭčych zavodaŭ dla pracy na ekspart) składaje kala 20 miljonaŭ ton.

«My ŭ kursie, što vašyja NPZ majuć patrebu ŭ nafcie. U Venesueły samyja vialikija zapasy nafty. U biełaruskich NPZ nia budzie niedachopu ŭ nafcie na praciahu 200 hadoŭ», — skazaŭ Čaves.

Usiaho try-čatyry hady tamu venesuelski naftavy kirunak vyhladaŭ davoli fantastyčnym nia tolki dla apazycyjnych analitykaŭ, ale i dla samoj ułady (nahadajem, Alaksandar Łukašenka sam jašče try hady tamu padčas vystupu ŭ Pałacie Pradstaŭnikoŭ zapeŭnivaŭ, što nie źbirajecca vazić naftu z Venesueły). Ale ŭ 2010-ym Rasieja ŭviała ekspartnaje myta na naftu, jakuju pastaŭlaje ŭ Biełaruś, u vyniku čaho nafta mocna padaražeła, i Biełaruś stała hublać, pavodle acenak specyjalistaŭ, kala 2 miljardaŭ dalaraŭ u hod. Čaves myta na svaju naftu nia ŭvodzić i, jak paličyli ŭžo rasiejskija specyjalisty, nafta z Venesueły, niahledziačy na ŭsie transpartnyja vydatki, tańniejšaja za rasiejskuju z mytam.

Aficyjnaja Biełaruś šukaje sabie palityčnaje i ekanamičnaje apiryšča ŭ krainach treciaha śvietu.

Tamu zastajecca «treci šlach — u treci śviet». Tamu abviaščajecca stratehičnym sajuźnikam Kitaj, čarhovy «praryŭ» čakajecca ź Iranam. Ale lideram u śpisie lepšych siabroŭ aficyjnaha Miensku zastajecca Uha Čaves.

Vidavočna, adnak, što matyvy dla supracoŭnictva ŭ abodvuch lideraŭ kardynalna adroźnivajucca. «My sumiesna budujem alternatyvu suśvietnamu imperyjalizmu», — kaža Čaves. Jak paviedamlajuć infarmacyjnyja ahienctvy, Łukašenka ničoha nie adkazaŭ na hetuju repliku. Miarkuju, što ŭ jaho chapiła rozumu nie raźvivać hetuju temu. Pakul Čaves maryć pra pieramohu nad suśvietnym imperyjalizmam, Łukašenka bolš prazaična dumaje pra toje, jak asłabić enerhietyčnuju zaležnaść ad Rasiei. «Suśvietny imperyjalizm» Biełarusi jašče spatrebicca — aficyjny Miensk biare ŭ jaho kredyty (i spadziajecca ŭziać jašče), plus tolki jon, zaklaty imperyjalizm, a nie Venesueła, moža, u vypadku čaho, dapamahčy Biełarusi abaranicca ad Rasiei.

Zabaŭna, darečy, što na fonie antyimperyjalistyčnych zaklinańniaŭ Venesueła dla Biełarusi pastupova robicca pravobrazam enerhietyčnaj kalonii — pryrodnyja resursy za niadoraha ŭ abmien na hatovyja pradukty i technalohii.

Kožny pryjezd Čavesa ŭ Biełaruś nahadvaje naviedvańnie rynku bahataha, ale naiŭnaha pakupnika (dobra, davajcie nia budziem užyvać słova «łoch»).

Dyk čamu b biełaruskamu kiraŭnictvu nie vykarystać takoha bahataha kiraŭnika (biez cara, ale z muchami ŭ hałavie), jaki hatovy płacić i dapamahać tym niamnohim palitykam u śviecie, jakija skažuć jamu dobraje słova? Epocha rasiejskaha «hazu ŭ abmien na pacałunki» skončyłasia, nastupaje epocha «nafta ŭ abmien na antyimperyjalistyčnyja traktary».

• 0
• 0
• 0
• 0
• 0
• 0
• 0
• 0