Dzianisa Ivašyna viarnuli z turmy ŭ mahiloŭskuju kałoniju №15

Svajaki ŭžo atrymali pieršyja listy z kałonii. Ź lista da maci ad 18 červienia vynikaje, što na toj momant Dzianis znachodziŭsia ŭ karancinie, paviedamiła ŭ Facebook žonka žurnalista Volha Ivašyna. Jašče praź niekalki dzion paštoŭka ad muža dajšła i da jaje.

Volha adznačaje, što jaje niepakoić fraza pra toje, što jon pakul nie zajmajecca fizkulturaj i «zachoŭvaje siabie ŭ aščadnym režymie».

Pavodle jaje, pieravod nazad u mahiloŭskuju kałoniju, kudy Dzianisa pieršapačatkova nakiravali adbyvać prysud, naŭrad ci možna rasceńvać jak palohku ŭ paraŭnańni z turmoj, dzie žurnalist adbyŭ minułyja try hady.

«Mahiloŭskaja «piatnaška» dla Dzianisa nasamreč horšaja za turmu ŭ Žodzinie. Pavodle zahadaŭ kiraŭnictva PK-15 jaho tam źbivali, a potym izalavali ad inšych viaźniaŭ u ŠIZA, kab nichto nie bačyŭ jahonyja siniaki. Bližej da pieravodu ŭ turmu jaho kidali ŭ ŠIZA (štrafny izalatar. — Red.) i PKT (pamiaškańnie kamiernaha typu. — Red.) praktyčna bieśpierapynna. Ździekvalisia ź jaho za toje, što razmaŭlaŭ i pisaŭ listy pa-biełarusku, listy źniščali, zabaraniali telefonnyja zvanki, praduktovyja pasyłki, spatkańni z baćkami. I ŭsio heta za niekalki miesiacaŭ u kałonii — jon i paŭhoda, zdajecca, tam nie paśpieŭ prabyć», — raspaviała Volha Ivašyna.

Sa słoŭ Volhi, maci žurnalista dniami atrymała ad administracyi kałonii aficyjny list pra toje, što źniavoleny Dzianis Ivašyn prybyŭ tudy 18 červienia 2026 hoda, i što paśla 13 lutaha 2030 hoda jon budzie mieć prava na ŭmoŭna-daterminovaje vyzvaleńnie. Ale dla hetaha jon musić svaimi pavodzinami «dakazać ułasnaje vypraŭleńnie».

Aproč hetaha ŭ liście za podpisam načalnika śpiecadździeła kałonii z proźviščam Maściepanienka paviedamlajecca, što paśla 9 studzienia 2029 hoda Dzianis Ivašyn moža pretendavać na zamienu pakarańnia na bolš miakkaje. Dla hetaha taksama nieabchodna davieści administracyi kałonii, što jon «ćviorda staŭ na šlach vypraŭleńnia». Abaviazkovym taksama źjaŭlajecca piśmovaje abiacańnie «pravapasłuchmianych pavodzin», adsutnaść spahnańniaŭ, sumlennaje staŭleńnie da pracy i maksimalnaje kampiensacyja «škody, naniesienaj złačynstvam».

U suviazi z apošnim svajakam prapanavana dapamahčy kampiensavać hetuju škodu i «akazać stanoŭčy ŭpłyŭ» na źniavolenaha. Pavodle słoŭ žonki žurnalista, materyjalnaja škoda, vyznačanaja sudom, daŭno pahašanaja.

«My spadziavalisia, što Dzianisa mohuć abmianiać na niejkich vajennapałonnych ci špijonaŭ, tamu vyrašyli apłacić usio, kab heta było ŭ paradku. I kab administracyja kałonii nie mieła dadatkovych ryčahoŭ cisku na Dzianisa. Što da paviedamleńnia z kałonii, to heta standartnaja pisulka, takuju rassyłajuć usim. Tam, da prykładu, ukazanyja normy dla viaźniaŭ pa kolkaści pasyłak, pieradač, spatkańniaŭ i hetak dalej. Ale, naprykład, u pieršaje pierabyvańnie Dzianisa ŭ PK-15 jamu adrazu skaracili atavarku da adnoj bazavaj vieličyni, chacia ŭzmocnieny režym dazvalaje dźvie bazavyja vieličyni. Nasamreč ŭsio vyrašajecca administracyjaj», — kaža Volha Ivašyna.

Dzianis Ivašyn — karespandent biełaruskaj niezaležnaj haziety «Novy Čas», redaktar-vałancior biełaruskaj viersii sajta mižnarodnaj rasśledavalnickaj supolnaści InformNapalm. Žurnalist viadomy svaimi rasśledavańniami pra ŭpłyŭ «ruskaha śvietu» na Biełaruś i Siryju, pra skandalnuju zabudovu ŭ miemaryjalnym uročyščy Kurapaty pad Minskam.

Dzianis Ivašyn byŭ zatrymany 12 sakavika 2021 hoda ŭ Hrodnie i asudžany na 13 hadoŭ i 1 miesiac źniavoleńnia za nibyta «zdradu dziaržavie» (art. 356 Kryminalnaha kodeksu) i «niezakonny zbor i raspaŭsiud źviestak ab pryvatnym žyćci» (art. 179 KK). Ahułam Dzianis Ivašyn znachodzicca ŭ źniavoleńni ŭžo bolš za 5 hadoŭ.

• 0
• 0
• 0
• 0
• 0
• 0
• 0
• 0