Novaje ŭ spravie zatrymanaj u Kijevie žurnalistki Kardaš: aryštavanyja hrošy pavinny viarnuć mužu
Rasśledavańnie spravy zatrymanaj sioleta ŭ Kijevie biełaruskaj žurnalistki Iny Kardaš zaviaršyli, nieŭzabavie sud pavinien pačać papiaredni jaje razhlad.
Śledčyja pieradali ŭ sud abvinavaŭčaje zaklučeńnie, paśla acenki jakoha na adpaviednaść patrabavańniam ukrainskaha zakanadaŭstva pavinny pačać razhlad spravy pa sutnaści, piša Radyjo Svaboda.
Zhodna z praceduraj, vyznačanaj Kryminalnym pracesualnym kodeksam Ukrainy, na papiarednim etapie, to bok pa vynikach razhladu abvinavaŭčaha akta, u vypadku najaŭnaści padstaŭ sudździa moža navat zakryć spravu. Kali abvinavaŭčy akt budzie adpaviadać zakonnym patrabavańniam, sud pavinien pryznačyć datu pačatku razhladu.
Kvalifikacyju złačynstva, učynienaha Inaj Kardaš, nie źmianili — Inu Kardaš abvinavačvajuć pavodle č. 1 artykuła 114 Kryminalnaha kodeksa Ukrainy (pieradača abo zbor inšaziemcam z metaj pieradačy inšaziemnaj dziaržavie, inšaziemnaj arhanizacyi abo ich pradstaŭnikam źviestak, jakija źjaŭlajucca dziaržaŭnaj tajamnicaj). Joj pahražaje pazbaŭleńnie voli na termin ad 10 da 15 hadoŭ z abo biez kanfiskacyi majomaści.
Kaciaryna Jusupava, advakatka Iny Kardaš, uskosna paćvierdziła, što sud u spravie jaje padabaronnaj užo pryznačyli, ale jana admoviłasia nazvać datu pieršaha pasiadžeńnia.
«Ja biez zhody svajoj klijentki nie maju prava publikavać nijakuju infarmacyju, źviazanuju ź joj, navat datu sudovaha pasiadžeńnia», — skazała Svabodzie advakatka Kardaš.
Novyja detali spravy
U kancy maja muž Iny Kardaš źviarnuŭsia ŭ sud pa skasavańnie aryštu na hrošy, znojdzienyja ŭ jaje padčas zatrymańnia — jano adbyłosia ŭ centry Kijeva, u restaranie hruzinskaj kuchni Khachapuri Ta Vyno.
U Kardaš tady z saboj było 2 150 dalaraŭ.
Jaje muž, dobraachvotnik, jaki słužyć u šturmavym padraździaleńni, śćviardžaje, što heta byli jahonyja hrošy — u sud jon prynios kvitancyi pa apieracyjach ab vydačy ŭ bankamacie hrašovych srodkaŭ ź jaho bankaŭskaj kartki. Na hetaj padstavie, niahledziačy na pratest śledčaha ŭ spravie, sud pryznaŭ, što hrošy naležać mužu Kardaš i pastanaviŭ skasavać ich aryšt.
U pačatku červienia muž paskardziŭsia ŭ sud na śledčaha praz toje, što toj ihnaravaŭ jaho zvaroty z prośbaj ab spatkańni z žonkaj. Sudździa admoviŭsia zavodzić spravu ab biaździejnaści śledčaha, ale abaviazaŭ jaho «zabiaśpiečyć vykanańnie pravoŭ na siamiejnaje žyćcio». Svabodzie pakul nie ŭdałosia paćvierdzić fakt ich sustrečy.
Što papiaredničała
Inu Kardaš zatrymali sioleta 21 studzienia i vystavili joj padazreńni ŭ špijanažy na karyść Kamiteta dziaržaŭnaj biaśpieki Biełarusi.
Na momant zatrymańnia Ina Kardaš užo pracavała ŭ Kaardynacyjnym štabie pa pytańniach abychodžańnia z vajennapałonnymi Hałoŭnaha ŭpraŭleńnia raźviedki Ministerstva abarony Ukrainy. Pavodle śledstva, jana kantaktavała z KDB praz hramadzianina Biełarusi, jaki «śviadoma dla jaje ažyćciaŭlaŭ kanfidencyjnaje supracoŭnictva sa śpiecsłužbami Biełarusi».
20 krasavika stała viadoma, što sud aryštavaŭ kvateru Iny Kardaš, kab zabiaśpiečyć viadzieńnie kryminalnaj spravy.
Rasśledavańnie spravy pavinna było skončycca 20 červienia.
U pačatku traŭnia kiraŭnik sakrataryjata Kaardynacyjnaha štabu pa pytańniach abychodžańnia z vajennapałonnymi Bahdan Achrymienka paviedamiŭ, što Minsk źviartaŭsia da Kijeva nakont abmienu Iny Kardaš.
«Taki sihnał byŭ, ale, akramia razmoŭ, pakul ničoha niama. My adkrytyja dla prapanoŭ. My nie zacikaŭlenyja ŭ tym, kab utrymlivać zamiežnych złačyncaŭ u našaj krainie, marnavać na ich biudžetnyja srodki ŭ toj čas, kali našy niezakonna asudžanyja hramadzianie znachodziacca za kratami ŭ niečałaviečych umovach. Kali ŭ kamunikacyi źjaviacca praktyčnyja prapanovy, my ich razhledzim», — skazaŭ Bahdan Achrymienka ŭ intervju ahienctvu «Ukrinform».
Ciapier čytajuć
Jakija retranślatary na miažy maje na ŭvazie Ukraina?10
Kamientary