«30 tysiač užo addaŭ za arendu». Prahramist usio paličyŭ i ŭziaŭ ipateku ŭ Vilni

— Ja vyrašyŭ, što ŭnioski za ipateku majuć dla mianie bolš sensu, čym štomiesiačnaja płata arendadaŭcu. I pačaŭ prapracoŭvać pytańnie kupli kvatery.

Pošukam i zboram infarmacyi ja zajmaŭsia samastojna, biez ahientaŭ i inšych pamahatych. Asnoŭny sajt dla pošuku žylla ŭ Litvie — aruodas.lt, usie miascovyja im karystajucca, infarmacyja tam aktualnaja, machlarstva ja nie zaŭvažyŭ.

Kvatery ŭ Litvie mohuć pradavacca bieź ziamli (na arandavanym municypalnym učastku) abo z dolaj ziamli, na jakoj staić dom. Apošni sposab časta tyčycca novabudoŭlaŭ, pabudavanych na vykuplenaj ziamli, i dla zamiežnikaŭ z trecich krain ździełka z takim abjektam prablematyčnaja, bo vałodać ziamloj u Litvie im nielha.

Što kupiŭ

Ja śviadoma paźbiahaŭ «kvater ź ziamloj», tamu spyniŭ svoj vybar na trochpakajoŭcy ŭ renavanym domie savieckaj pabudovy, jaki staić na municypalnaj ziamli.

Čamu trochpakajoŭka? Nu, tamu što mahu sabie dazvolić. Čamu nie novabudoŭla? Tamu što tam zusim inšyja ceny + pieraškoda ŭ vyhladzie ziamli.

Heta kvatera ŭ narmalnym rajonie, z ramontam — nie supiersučasnym, ale ŭzroŭniu «zaŭtra zajazdžaj i žyvi». U pierśpiektyvie treba stavić sučasnuju elektryku.

Cana — kala 160 tysiač jeŭra. Ja sprabavaŭ handlavacca z haspadarom — udałosia skinuć paru tysiač.

Napeŭna, možna było skinuć i bolš, ale mnie chaciełasia chutčej zakryć pytańnie. Zabiahajučy napierad: praces usio roŭna raściahnuŭsia na try miesiacy.

Za hady žyćcia ŭ Litvie ja nazapasiŭ hrošy na pieršapačatkovy ŭniosak, dla astatniaj častki mnie patrebna była ipateka. Raśpišu etapy ipatečnaha pracesu zychodziačy sa svajho dośviedu.

Pisać bankam možna pačynać jašče da taho, jak vy znajšli žyllo — prosta, kab udakładnić, ci daduć vam kredyt u pryncypie i na jakuju sumu možna raźličvać.

Ja tak i zrabiŭ. Napisaŭ adrazu ŭ niekalki: Swedbank, Seb i Luminor. Usie adkazali, što zhodny, ale dla ŭdakładnieńnia ŭmoŭ treba vybrać abjekt i dasłać jaho acenku.

Taksama banki zapytali pachodžańnie srodkaŭ. Asnoŭnaja častka majho aščadku — heta litoŭski zarobak, tut usio prazrysta, ale voś za 1000 jeŭra, jakija ja kaliści pakłaŭ hatoŭkaj na rachunak, paprasili spravazdačycca asobna. Dziakuj staromu pracadaŭcu ŭ RB — dasłaŭ mnie daviedku ab zarobku za apošni hod pracy, hetaha było dastatkova.

Acenka kvatery

Vybraŭšy kvateru, ja zaklučyŭ z haspadarom papiaredni dahavor (daviałosia pakinuć nievialiki zakład) i zamoviŭ acenku koštu abjekta (300 jeŭra). Heta abaviazkovaja ŭmova dla ipateki: na sajcie bankaŭ jość śpis acenščykaŭ, ź jakimi pracuje kankretny bank. Možna vybrać takoha, jaki partniorstvuje adrazu ź niekalkimi bankami, tady adnu acenku možna pradublavać usim.

Važny momant: ad taho, ci byŭ dom renavany, zaležyć nie tolki acenka i kamunalnyja płaciažy (jany mohuć adroźnivacca ŭ niekalki razoŭ), ale i prapanovy bankaŭ. Čym vyšejšaja enierhaefiektyŭnaść doma, tym vyhadniejšyja ŭmovy.

Kredytnaja prapanova

Kali acenka hatovaja, možna adpraŭlać u bank paŭnavartasnuju zajaŭku — u adkaz vam robiać kredytnuju prapanovu z ulikam typu i koštu kankretnaha abjekta. Usie kredyty, jakija mnie prapanoŭvali, byli anuitetnymi.

Anuitetny kredyt — heta schiema pahašeńnia pazyki, pry jakoj pazyčalnik vypłačvaje doŭh roŭnymi dolami praz adnolkavyja pramiežki času. Suma zastajecca fiksavanaj, ale ŭnutry jaje mianiajecca raźmierkavańnie asnoŭnaha doŭhu i pracentaŭ. Spačatku bolšaja častka płaciažu idzie na pahašeńnie pracentaŭ.

Maksimalny termin vahaŭsia ad 20 da 30 hadoŭ. Banki rabili adrazu pa dźvie prapanovy: ź fiksavanaj staŭkaj i płavajučaj (staŭka EURIBOR + marža banka). Umovy ŭ Seb i Luminor byli lepšyja, čym u Swedbank. Roźnica pa maržy pamiž lepšaj i horšaj prapanovaj skłała 0,6 p.p.

EURIBOR (Euro Interbank Offered Rate) — heta ŭsiarednienaja pracentnaja staŭka, pa jakoj jeŭrapiejskija banki dajuć niezabiaśpiečanyja kredyty na mižbankaŭskim rynku. Ciapier 12‑miesiačnaja staŭka EURIBOR — 2,755%. 

Pieršapačatkovy ŭniosak. U tych bankach, kudy ja źviartaŭsia, patrabavali ad 15 da 30% koštu kvatery. Ale heta papiarednie. Kali ja skinuŭ im acenku kvatery, u banku ź minimalnym paroham 15% mnie jaho krychu padniali, a ŭ banku z paroham 30%, naadvarot, prapanavali źnizić.

Za maržu i pieršapačatkovy ŭniosak z bankam možna handlavacca, asabliva kali ŭ vas na rukach niekalki prapanoŭ i vy možacie apieravać imi jak arhumientami.

Ja pasprabavaŭ skinuć maržu, ale mnie nie ŭdałosia. Jana zastałasia 1,5%.

Usiaho hadavaja staŭka, pa jakoj ja vypłačvaju kredyt (EURIBOR +1,5%) — krychu bolš za 4%.

Ździełka ŭ nataryusa

Paśla taho jak bank kančatkova ŭchvalić kredyt, vy idziacie z pradaŭcom da nataryusa i płacicie svaju častku (viadoma, pieravodam). Pasłuhi nataryusa z pradaŭcom apłačvajecie napałovu (ale heta treba prapisać u papiaredniaj damovie), plus da hetaha pakryvajecie vydatki na pieraafarmleńnie kvatery (dakumienty padaje sam nataryus). Mnie hetyja pasłuhi abyšlisia 300 jeŭra. 

Strachoŭka i ipatečnaje pahadnieńnie ŭ banku

Paśla taho jak kvateru aformili na vas, jaje treba zastrachavać. Samaja tannaja strachoŭka kaštuje kala 100 jeŭra na hod. 

Ciapier vy znoŭ pišacie ŭ bank, bank źviazvajecca z nataryusam, zaklučaje z vami ipatečnaje pahadnieńnie i pieraličvaje pradaŭcu astatniuju častku sumy.

Teoryja vs praktyka

Pieršapačatkova hety praces byŭ mnie bolš-mienš zrazumieły. Tym nie mienš jon zaniaŭ značna bolš času, čym zdavałasia napačatku.

Ad papiaredniaj zajaŭki ŭ bank da kančatkovaha raźliku z pradaŭcom prajšło kala troch miesiacaŭ.

Čamu tak doŭha? Tamu što na kožny etap uzhadnieńnia bank tracić pa adnym-dvum tydni. Naprykład, ja addaŭ u bank acenku kvatery, praź niekalki dzion mnie dasłali ipatečnuju prapanovu. Ja adkazaŭ, što zhodny. Mnie skazali, što ciapier treba zaćvierdzić kredyt, heta zojmie 5‑10 rabočych dzion. Praz tydzień pišuć: kredyt zaćvierdzili, ciapier treba adkryć rachunak, ź jakoha ja budu apłačvać ipateku, paśla hetaha bank dašle mnie dakumienty na podpis. Potym vyśviatlajecca, što, tak jak ja nie hramadzianin ES, dla adkryćcia rachunku patrebna jašče adna pravierka terminam «ad 10 rabočych dzion i daŭžej». A potym mieniedžar, jakaja viała maju ipateku, pajšła na dva tydni ŭ adpačynak.

Tak što lepš zahadzia zakładvać dadatkovy čas na biurakratyju.

Ekanomika pakupki

Miesiačnaja płata za ipateku ŭ mianie ciapier 580 jeŭra. Dobra, dadajcie drobiaź za strachoŭku i absłuhoŭvańnie rachunku, chaj budzie 600 jeŭra + kamunałka.

Arenda takoj ža trochpakajoŭki ŭ padobnym rajonie (Karaliniški, Tuskulenaj, Šeškinie i da t.p.) kaštuje 700—800 jeŭra + kamunałka.

Atrymlivajecca, ja płaču navat mienš, čym za arendu, pryčym heta nie niezvarotnyja straty, kožny miesiac ja vykuplaju svaju kvateru pa kavałačku. Pry nieabchodnaści jaje možna pradać, navat ź niavypłačanaj ipatekaj (choć heta i składaniej).

Kredyt na 30 hadoŭ. Ale ja mahu vypłacić jaho daterminova biez štrafu.

Płany na budučyniu

Jany, jak i ŭ mnohich, tumannyja. Pakul ja vymušany žyć u Litvie. Hramadzianstva čakać jašče doŭha, tamu budu pakul płacić ipateku.

Nakolki ja ŭpeŭnieny ŭ svaim pracadaŭcy? Jak i astatnija: ja razumieju, što mianie mohuć skaracić i znajści inšuju pracu budzie niaprosta. 

Nakolki ja ŭpeŭnieny ŭ tym, što Litva zastaniecca biaśpiečnym miescam? Nie ŭpeŭnieny.

Tolki što heta mianiaje? Žyć ža ŭsio roŭna niedzie treba. Niedzie brać 500‑700 jeŭra, kab zapłacić za žyllo, mnie pryjdziecca ŭ lubym vypadku. Z kvateraj va ŭłasnaści navat praściej. 

Kali z hrašyma pryciśnie, ja zmahu jaje zdać i pierajechać, skažam, u adnapakajoŭku ŭ rajon horšy. Atrymajecca pasiŭnaja krynica dachodu.

Dy i ŭvohule ja pabačyŭ u žyćci ŭsialakaha dziarma. Addaju pieravahu vyrašać zadačy pa miery ich pastupleńnia. Za toj čas, što ja žyvu ŭ Litvie, ja ŭžo addaŭ za arendu tysiač 30 jeŭra. Možna jašče paru hadoŭ padumać, jak žyć dalej, i zapłacić jašče tysiač 10-15.

Kvatera, chaj i ipatečnaja, heta ŭsio ž taki aktyŭ. Navat kali ja źjedu, jaje možna zdać. Abo pradać, chaj i sa źnižkaj, ale chacia b častku srodkaŭ možna viarnuć. Kali ž praciahvać žyć u arendnym žylli, viarnuć ničoha nielha. To bok heta nie vybar pamiž «praź piać hadoŭ u mianie ipateka na šyi abo najaŭnyja hrošy ŭ kišeni», heta vybar pamiž «nizkalikvidny aktyŭ va ŭłasnaści abo ničoha».

• 9
• 0
• 0
• 2
• 1
• 0
• 0
• 0