U Biełarusi pačali pramysłovuju vytvorčaść substratu ź micelijem dla vyroščvańnia šampińjonaŭ. Novy kambinat adkryŭsia ŭ vioscy Jančuki Ščučynskaha rajona, piša Times.by.
Pradpryjemstva budzie vypuskać tak zvanuju «hrybnuju rasadu» — śpiecyjalny pažyŭny substrat, zasieleny micelijem šampińjonaŭ, jaki zatym pastaŭlajecca na hrybavodčyja fiermy dla dalejšaha vyroščvańnia hryboŭ.
Vytvorčaść arhanizavanaja pa pryncypie zamknionaha cykłu. Dla pryhatavańnia substratu vykarystoŭvajucca miascovaja sałoma i adkidy ptuškahadoŭli, jakija pierapracoŭvajucca ŭ arhaničnaje ŭhnajeńnie. Paśla ŭ pažyŭnaje asiarodździe ŭvodzicca micelij, u vyniku čaho atrymlivajecca hatovaja asnova dla vyroščvańnia šampińjonaŭ.
Technałahičny praces patrabuje strohaha kantrolu tempieratury i sterylnaści. Pa słovach raspracoŭščykaŭ prajekta, heta dazvalaje źnizić ryzyku straty ŭradžaju i pavysić efiektyŭnaść pracy hrybavodčych haspadarak.
Płanujecca, što pradpryjemstva budzie adhružać kala 360 ton hatovaha substratu štotydzień, abo prykładna 19 tysiač ton za hod.
Prajekt realizavany pry ŭdziele pryvatnaha inviestara i ź dziaržaŭnaj padtrymkaj. Dla pracy novaha kompleksu stvorana 25 pastajannych pracoŭnych miescaŭ. Vytvorčaść maje vysoki ŭzrovień aŭtamatyzacyi.
Kamientary