SAAZ abviaściła ŭspyšku lichamanki Eboła ŭ Afrycy nadzvyčajnaj situacyjaj mižnarodnaha značeńnia
Suśvietnaja arhanizacyja achovy zdaroŭja pryznała novuju ŭspyšku lichamanki Eboła ŭ Demakratyčnaj Respublicy Konha i Uhandzie nadzvyčajnaj situacyjaj u halinie hramadskaj achovy zdaroŭja, jakaja ŭjaŭlaje pahrozu dla susiednich krain.
Pavodle zajavy viedamstva, raspaŭsiudžvańnie infiekcyi niasie surjoznuju pahrozu dla susiednich dziaržaŭ, a miedycynskaja arhanizacyja «Daktary bieź miežaŭ» užo nazvała situacyju krajnie tryvožnaj i pačała razhortvańnie maštabnych mier reahavańnia.
Asnoŭnaja niebiaśpieka ciapierašniaj epidemii, jakaja pačałasia ŭ druhoj pałovie krasavika, zaklučajecca ŭ jaje śpiecyfičnym štamie Bundybuhia.
U adroźnieńnie ad bolš raspaŭsiudžanaha varyjantu Zair, suprać hetaha virusa siońnia nie isnuje nivodnaj zaćvierdžanaj vakcyny ci efiektyŭnych lekaŭ. Pry hetym siaredni ŭzrovień śmiarotnaści ad lichamanki zastajecca vielmi vysokim i dasiahaje kala piacidziesiaci pracentaŭ.
Śpiecyjalisty pakul nie zmahli vyjavić nulavoha pacyjenta, što nie dazvalaje acanić sapraŭdnyja maštaby biady, adnak užo ciapier u kanhalezskaj pravincyi Itury zafiksavana kala 90 śmierciaŭ i sotni padazronych vypadkaŭ. Virus taksama zdoleŭ prarvacca ŭ stalicu krainy Kinšasu i vyjści za miežy dziaržavy — łabaratorna paćvierdžanyja vypadki, u tym liku adzin latalny, zarehistravany ŭ stalicy Uhandy Kampale.
Baraćba z chvarobaj značna ŭskładniajecca vajenna-palityčnaj abstanoŭkaj u hałoŭnym ačahu infiekcyi. Pravincyja Itury znachodzicca ŭ poŭnaj izalacyi za dźvie tysiačy kiłamietraŭ ad stalicy i kantralujecca vajskoŭcami z-za pastajannych napadaŭ miascovych uzbrojenych hrup i bajevikoŭ, źviazanych z terarystyčnymi arhanizacyjami. Heta robić dastaŭku ekśpiertaŭ, miedykamientaŭ i adsočvańnie kantaktaŭ chvorych śmiarotna niebiaśpiečnaj zadačaj.
Dla strymańnia epidemii SAAZ rekamiendavała terminova izalavać usich pacyjentaŭ, arhanizavać štodzionny manitorynh i zabaranić mižnarodnyja pajezdki dla patencyjna zaražanych asob na dvaccać adzin dzień.
Uładam Konha i Uhandy zahadana razharnuć centry nadzvyčajnych apieracyj i pravierki na darohach.
Razam z tym arhanizacyja zaklikała suśvietnuju supolnaść nie zakryvać miežy i nie spyniać handal z paciarpiełym rehijonam, bo padobnyja kroki hruntujucca tolki na strachu, nie majuć navukovaha abhruntavańnia i vymusiać ludziej pierasiakać miežy nielehalna i niekantralujema.
Kamientary