U Bydhaščy palaka sudziać za špijanaž. Jon jeździŭ sa znajomym u Biełaruś i padviarhaŭsia dopytu na miažy
U Akruhovym sudzie Bydhaščy sudziać 28‑hadovaha hramadzianina Polščy Viktara Z., jakoha abvinavačvajuć u špijanažy na karyść rasijskaj raźviedki. Cikavaść da supracoŭnictva jon nibyta prajaviŭ padčas dopytu na biełaruskaj miažy ŭ Breście, kali sa znajomym jeździŭ na jaho radzimu. Pra praces raskazała Gazeta Wyborcza, a vydańnie Most pierakazała asnoŭnuju infarmacyju pa hetaj spravie.
Pavodle viersii śledstva, Viktar Z. źbiraŭ i viasnoj minułaha hoda sprabavaŭ pieradać infarmacyju pra Centr padrychtoŭki abjadnanych sił NATA, aeraport Bydhaščy, vajskovy avijacyjny zavod i pradpryjemstva Nitro-Chem — stratehičnaha vytvorcu traciłu dla krain NATA. Voś tolki realnym atrymalnikam źviestak stali nie rasijskija śpiecsłužby, a polskija.
«Vy čałaviek z pravilnymi pohladami»
Pa adukacyi Viktar Z. pijanist, taksama jon skončyŭ fakultet prykładnoj linhvistyki. Mužčyna svabodna razmaŭlaje pa-niamiecku i pa-rusku i zachaplajecca Rasijaj. Taksama jon zachaplaŭsia ASG — vajskova-taktyčnaj hulnioj, raznavidnaściu piejntboła. Dziakujučy hetamu chobi jon paznajomiŭsia ź dziaŭčynaj Martaj, na jakuju sprabavaŭ zrabić uražańnie. Ciapier jana davała pakazańni ŭ sudzie.
Jak adznačaŭ Viktar, u Biełaruś jon pajechaŭ u turystyčnych metach sa znajomym Valeryjem, biełarusam, i jaho tahačasnaj dziaŭčynaj Darjaj.
«Jon raskazvaŭ, što jaho zatrymała na miažy niejkaja słužba ŭnutranaj biaśpieki. Ź im i jašče niejkim ukraincam razmaŭlali, ahledzieli telefon, pytalisia pra palityčnyja pohlady, pra staŭleńnie da Rasii i Biełarusi. Jon pakazvaŭ svaje fatahrafii ŭ savieckaj formie, — raskazała Marta. — Jon nie kazaŭ, što tady prahučała jakaja-niebudź prapanova adnosna supracoŭnictva z zamiežnymi słužbami. Jon pieradaŭ infarmacyju pra toje, dzie spynicca ŭ Biełarusi, i svaje kantakty. «Vy čałaviek z pravilnymi pohladami», — pačuŭ jon [ad biełaruskaha supracoŭnika]».
Valeryj pryjechaŭ u Polšču na zarobki i paznajomiŭsia ź Viktaram, jaki byŭ jaho kaardynataram ad ahienctva pa pracaŭładkavańni. Jon tłumačyŭ palaku, što takija dbajnyja pravierki palakaŭ i ŭkraincaŭ na miažy — norma dla Biełarusi. Biełarus ličyŭ, što za hetym stajali pamiežniki. Ale, vierahodna, Viktar nadaŭ hetamu dopytu bolšaje značeńnie, ličačy, što jaho vioŭ KDB.
U razmovie z polskimi znajomymi mužčyna nie chavaŭ svaich prarasijskich pohladaŭ, raźličvaŭ na pieramohu Rasii ŭ vajnie z Ukrainaj i nazyvaŭ ukraincaŭ banderaŭcami, fašystami i nacystami. Akramia taho, jon zhadvaŭ abjekty NATA i zadavaŭsia pytańniem, što było b, kali b infarmacyju pra ich «źlili na Uschod».
«Ty mianie nie viedaješ, a ja ciabie viedaju»
Jak mienavita polskim śpiecsłužbam stała viadoma pra namiery Viktara, nie viadoma. Ale 12 sakavika 2025 hoda jon źviazaŭsia z Martaj, skazaŭšy, što choča pahavaryć. U mašynie na parkoŭcy kala supiermarkieta jon pakazaŭ dziaŭčynie paviedamleńnie ad rasijskaha boku: ź im ustalavali kantakt i chočuć zaprasić da supracoŭnictva. Viktar byŭ uschvalavany i paličyŭ, što heta nastupstva minułahodniaj razmovy na biełaruskaj miažy.
Paviedamleńnie było napisana pa-rusku. U im havaryłasia: «Ty mianie nie viedaješ, a ja ciabie viedaju».
Nasamreč za paviedamleńniem stajała nie rasijskaja raźviedka, a aficer polskaha Ahienctva ŭnutranaj biaśpieki. Viktar Z. abmianiaŭsia ź im niekalkimi elektronnymi listami, paśla čaho, 4 červienia 2025 hoda, jaho zatrymali.
Nastupnaje pasiadžeńnie suda adbudziecca 8 červienia. Viktar zastaniecca pad vartaj jak minimum da 28 žniŭnia.
Na dziaržaŭnym telebačańni anansavali film pra hramadzianina Litvy, asudžanaha na 15 hadoŭ za špijanaž
U Rasii pasudamyjščycu, jakaja pracavała ŭ kadeckim korpusie SK, pryhavaryli da 19 hadoŭ kałonii za viarboŭku vučnia
Biełaruś choča zabrać žurnalistku Inu Kardaš, jakuju va Ukrainie vinavaciać u špijanažy na KDB
U Bierlinie zatrymali rasijskaha špijona z Kazachstana
Brendavaja sumačka za $4 tysiačy i bryljanty. Vice-mis Biełarusi Alija Karotkaja schadziła ź siabroŭkaj pajeści dranikaŭ7
Brendavaja sumačka za $4 tysiačy i bryljanty. Vice-mis Biełarusi Alija Karotkaja schadziła ź siabroŭkaj pajeści dranikaŭ
Na Afonie adšukali try nieviadomyja raniej asobniki Astrožskaj Biblii. Dla jaje stvareńnia drukar Ivan Fiodaraŭ, vychadziec ź Biełarusi, vykarystoŭvaŭ teksty Skaryny66
Kamientary
Bo jość ryzyki trapić u lohkuju fabrykacyju spraŭ zamiest pošuku realnych špijonaŭ, jak heta adbyvajecca ŭ KDB/FSB.
Čałaviek u raskazie padazrony. Tut važna, ci časta takoje vykarystoŭvajecca.