Pieršyja vyniki vybaraŭ u Brytanii: lejbarysty cierpiać parazu, Reform UK zachoplivaje pazicyi pa ŭsioj krainie

Pakul viadomyja tolki pieršyja vyniki, u bolšaści municypalitetaŭ padlik praciahvajecca. U pryvatnaści, jašče nie padličanyja hałasy ŭ Šatłandyi i Uelsie. Adnak papiarednija vyniki demanstrujuć stratu pazicyj kirujučaj Lejbarysckaj partyi i tryumf pravapapulisckaj partyi Reform UK Najdžała Faradža, piša Bi-bi-si.

Hałasavańnie ŭ Šatłandyi, Uelsie i 136 anhlijskich savietach palitołahi nazyvajuć najbujniejšym elektaralnym testam z času ŭsieahulnych vybaraŭ 2024 hoda i važnaj pravierkaj dla premjer-ministra Kira Starmiera.

I choć da abviaščeńnia kančatkovych vynikaŭ jašče jak minimum niekalki hadzin, ahulnyja tendencyi ŭžo dobra prasočvajucca.

U lidarach ź vialikim adryvam — Reform UK, pośpiech jakoj na ciapierašnich vybarach nie staŭ siurpryzam. Na letašnich municypalnych vybarach jana taksama nabrała najbolšuju kolkaść hałasoŭ.

Adnak uražlivyja vyniki Reform UK pakazvajuć stupień rasčaravańnia brytanskich vybarščykaŭ tradycyjnymi partyjami, jakija za minuły hod tak i nie zmahli ničoha supraćpastavić jaje lidaru Najdžełu Faradžu.

Vybarščyki niezadavolenyja niazdolnaściu dźviuch asnoŭnych i najstarejšych brytanskich partyj — Lejbarysckaj i Kansiervatyŭnaj — navieści paradak u hałoŭnych pytańniach unutranaha paradku dnia — ekanomicy i mihracyjnaj palitycy.

Uśled za Reform UK ščylnaj hrupaj (prynamsi, na dadzienym etapie) iduć lejbarysty, kansiervatary, libierał-demakraty i Partyi zialonych Anhlii i Uelsa.

I heta jašče adzin cikavy momant, kažuć ekśpierty. Pra toje, jak brytanskaja palityka ŭsio macniej drabnicca, kazali daŭno — i ciapier heta bačna asabliva vyrazna. Nivodnaj partyi nie ŭdajecca damahčysia ŭpeŭnienaha daminavańnia, a hałasy raspadajucca jak minimum pa piaci roznych napramkach.

Partyja Reform UK za noč adabrała ŭražlivuju kolkaść mandataŭ jak u lejbarystaŭ, tak i ŭ kansiervataraŭ. Asabliva kidajecca ŭ vočy paražeńnie Lejbarysckaj partyi ŭ svaich tradycyjnych ćviardyniach na poŭnačy Anhlii i ŭ Midlendsie, uklučajučy Uihan, Bołtan, Sałford i Chałtan.

Pry hetym pieršuju miascovuju radu, jakuju Reform UK udałosia adabrać u chodzie načnoha padliku hałasoŭ, raniej kantralavali kansiervatary — heta Ńjukasł-andar-Łajm.

U bolšaści radaŭ, dzie padlik pačaŭsia nočču, pieravybirałasia tolki tracina miescaŭ, tak što paźniej na praciahu dnia ŭ Reform moža źjavicca jašče bolš šancaŭ uziać uładu ŭ municypalitetach.

Ale ŭžo zaraz možna kazać pra surjozny pośpiech partyi Faradža: jana vyjhraje prykładna tracinu ŭžo raźmierkavanych mandataŭ.

Lejbarysty, naadvarot, užo stracili krychu mienš za pałovu miescaŭ, jakija sprabavali ŭtrymać, — a abaraniać im u hetaj elektaralnaj kampanii davodziłasia bolš za ŭsio mandataŭ.

Partyjny štab Lejbarysckaj partyi zajaŭlaje, što pramiežkavyja vybary tradycyjna byvajuć ciažkimi dla kirujučych partyj, i na ich padstavie zvyčajna nielha prahnazavać zychod nastupnych usieahulnych vybaraŭ.

Heta dakładna, kažuć ekśpierty, ale da peŭnaj stupieni. Naprykład, u 2011, 2015, 2017 i 2021 hadach kirujučaja partyja nie hublała pazicyi pa liku miescaŭ, a lejbarysty zaraz hublajuć ich vielmi surjozna.

«Ja nie źbirajusia sychodzić i pahružać krainu ŭ chaos», — zajaviŭ Kir Starmier paśla taho, jak pieršyja vyniki pakazali vialikija straty dla Lejbarysckaj partyi.

Jon nahadaŭ pra razhromnuju pieramohu lejbarystaŭ na ŭsieahulnych vybarach u lipieni 2024 hoda: «Ja pryvioŭ našu partyju da hetaj pieramohi, i heta piacihadovy mandat na źmienu krainy».

Starmier dadaŭ, što «ŭ bližejšyja dni» vykładzie «dalejšyja kroki», jakija Lejbarysckaja partyja maje namier raspačać, kab viarnuć davier vybarščykaŭ.

Na pytańnie, ci źbirajecca jon udzielničać u nastupnych usieahulnych vybarach, premjer adkazaŭ: «Tak. Mianie abrali na piacihadovy termin, i ja maju namier davieści hetuju pracu da kanca».

• 3
• 1
• 2
• 0
• 0
• 1
• 0
• 0