Łukašenka nazvaŭ prezidenta ZŠA dačaśnikam.
Padčas razmovy ź biełaruskim kiraŭnikom žurnalist Russia Today Ryk Sančes liśliva raspavioŭ nibyta pra vysoki ŭzrovień padtrymki Łukašenki z boku nasielnictva. Pavodle jaho słoŭ, danyja apytańniaŭ, praviedzienych biełaruskimi sacyjołahami, pakazvajuć padtrymku na ŭzroŭni 78% nasielnictva krainy, piša BiełTA.
«Niekatoryja zachodnija lidary, takija jak Tramp, Makron, Starmier, — jany ŭsie razam uziatyja, mahčyma, nie majuć takoj padtrymki svajho nasielnictva i tolki marać pra toje, kab ich tak padtrymlivali, — skazaŭ Sančes. — Moža być, jany i kažuć, što vy dyktatar, i tak da vas staviacca mienavita tamu, što, mahčyma, zajzdrościać ličbam?»
«Siarod palitykaŭ peŭnaja zajzdraść adzin da adnaho ŭ nas jość. Heta sapraŭdy tak, — skazaŭ Łukašenka. — Vy absalutna majecie racyju, ja taksama pra heta časta dumaju. Daj boh, kab u niejkaha zachodniaha palityka było nie 78 pracentaŭ i nie 80 pracentaŭ, ale chacia b 60 pracentaŭ (padtrymki nasielnictva)».
Łukašenka vykazaŭsia i pra prezidenta ZŠA Donalda Trampa.
«Jon dačaśnik, u jaho 4 hady. Što jon za 4 hady zrobić? Ničoha. Ničoha nie zrobić. Tamu ŭ prezidenta pavinien być čas», — skazaŭ Łukašenka, jaki adnaasobna kiruje ŭžo amal 32 hady Biełaruśsiu.
U 2020 hodzie Alaksandr Łukašenka, pavodle acenak naziralnikaŭ, prajhraŭ vybary Śviatłanie Cichanoŭskaj, ale nie addaŭ ułady, a raspačaŭ masavyja represii.
Pryčym pavodle vynikaŭ postvybarčaha dziaržaŭnaha apytańnia, za Alaksandra Łukašenku prahałasavali 21%, za Śviatłanu Cichanoŭskuju — 33%. 11% zajavili, što nie hałasavali, a jašče 26% nie zachacieli adkazvać na pytańnie.
Tym časam Łukašenku namalavali 80%, a Cichanoŭskaj — usiaho 10%.
Na vybarach 2015 hoda za Łukašenku źbiralisia hałasavać 45%. Astatnija kandydaty (uklučna z Taćcianaj Karatkievič) mieli padtrymku na ŭzroŭni statystyčnaj pamyłki — nižej za 1%. Ale ažno 52% admovilisia adkazvać na pytańnie sacyjołahaŭ.
Kamientary
I hladia, na hłumlivyje zajavlenija łukašienko, v adries trampa, poślednije 2 dnia, tak ono i jesť.