U Homieli źniasuć davajenny Dom suviazi — zaminaje pašyryć vulicu, jakaja ŭ hetym miescy i tak maje vosiem pałos
U Homieli płanujuć źnieści adzin ź niešmatlikich zachavanych budynkaŭ mižvajennaha času — tak zvany Dom suviazi, raźmieščany pa vulicy Barykina, 1. Hety čatyrochpaviarchovy žyły dom sustrakaje hamialčan adrazu pry pierajeździe z centra horada praz Kuźniecki puciepravod.
Zhodna z hienieralnym płanam, placoŭka pad im pojdzie pad novuju zabudovu i pašyreńnie darohi, adnak miascovyja ŭłady adznačajuć, što praces moža zaciahnucca na doŭhija hady, piša vydańnie «Biełka».
Žyły dom u styli kanstruktyvizmu byŭ uźviedzieny ŭ 1930‑ia jak viedamasnaje žyllo dla rabotnikaŭ haradskoj suviazi (adsiul i histaryčnaja nazva).
Jak adznačaje telehram-kanała «Spadčyna», budynak uzvodziŭsia pa typavym (paŭtorna vykarystanym) prajekcie. Dakładna takija ž damy budavalisia i ŭ inšych haradach — naprykład, dom pa vulicy Śviardłova, 15 u Minsku, a taksama jašče adzin nieapaznany budynak, viadomy pa starym čorna-biełym fotazdymku.
Z apošnim homielski dom padobny i afarmleńniem fasadaŭ: jany majuć padobnuju rustoŭku fasadaŭ, mižpavierchavyja ciahi i słuchavyja vokny na dachu. Ale dom u Homieli adroźnivaje toje, što jon nie maje mahutnych ščytoŭ na tarcach, a bałkonnyja vokny i dźviery padzieleny pamiž saboj praścienkami. Heta kaža pra toje, što niahledziačy na adnolkavyja płany da realizacyi kožnaha budynka architektary padychodzili z tvorčym pieraasensavańniem.
Na niamieckich aerafotazdymkach časoŭ Druhoj suśvietnaj vajny bačna, što budynak acaleŭ u čas bambiožki susiedniaha čyhunačnaha vuzła letam 1941 hoda. Ale paśla vajny jon byŭ užo ŭ zrujnavanym stanie. U 1947 hodzie Homielski haradski saviet pieradaŭ budynak pošcie. Suviazisty adnavili jaho haspadarčym sposabam, adpracavaŭšy na abjekcie kala 85 niadzielnikaŭ.
Dom pa vulicy Barykina, 1 u siaredzinie XX stahodździa. Fota: Biełka
Ofisy zamiest kvater
Siońnia Dom suviazi znachodzicca ŭ davoli drennym techničnym stanie. Pa infarmacyi haradskich partałaŭ, u čatyrochpaviarchoviku zastałosia ŭsiaho try žyłyja kvatery, žychary jakich daŭno čakajuć raśsialeńnia. Astatnija płoščy pieraviedzienyja ŭ niežyły fond i zdajucca ŭ arendu kamiercyjnym strukturam.
Pry hetym budynak praciahvaje častkova vykonvać svaju histaryčnuju funkcyju: na pieršym paviersie dahetul pracuje adździaleńnie paštovaj suviazi №1. Na fasadzie ŭstalavana miemaryjalnaja doška ŭ honar Jemialjana Barykina — sakratara padpolnaha harkama KPB i Hieroja Savieckaha Sajuza, imiem jakoha i nazvana vulica.
Płany pa znosie i pašyreńni vulicy
Žychary doma źviarnulisia ŭ harvykankam z pramym pytańniem pra los budynka. Načalnica ŭpraŭleńnia architektury i horadabudaŭnictva Homielskaha harvykankama Taćciana Nieścierava aficyjna paćvierdziła, što pavodle hienpłana dom №1 padlahaje znosu.
Placoŭka pad budynkam častkova traplaje ŭ zonu novaj šmatkvaternaj zabudovy (instytut «Homielprajekt» užo raspracavaŭ kancepcyju zabudovy hetaha ŭčastka 7— 8‑paviarchovymi damami), a častkova — u miežy pašyreńnia vulicy Barykina i sanitarna-achoŭnuju zonu čyhunki.
Siońnia ŭ hetym miescy prajeznaja častka vulicy maje vosiem pałos. Aktyvisty iranizujuć nad płanami pašyreńnia vulicy Barykina, bo papiarednija dabaŭleńni pałos tak i nie vyrašyli prablemu zatoraŭ na hetaj mahistrali.
Niahledziačy na aficyjnyja płany, chutkaha znosu histaryčnaha budynka nie pradbačycca. U harvykankamie padkreślivajuć, što realizacyja horadabudaŭničaj dakumientacyi nosić praciahły charaktar i zaležyć ad finansavańnia, tamu kankretnych terminaŭ niama.
Akramia taho, u haradskim Upraŭleńni kapitalnaha budaŭnictva ŭdakładnili, što maštabnuju začystku cotnaha i niacotnaha bakoŭ vulicy Barykina, dzie ahułam płanujuć źnieści bolš za 50 pryvatnych damoŭ, pačnuć nie ź pieršaha numara, a z doma №5.
U admietnaha ŭzoru homielskaj mižvajennaj architektury, choć pakul jon zastajecca na svaim miescy, pierśpiektyŭ na zachavańnie ci restaŭracyju ŭ jaho, zhodna z dakumientami, užo niama.
«Naša Niva» — bastyjon biełaruščyny
PADTRYMAĆCiapier čytajuć
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam18
Kamientary