Jaki pamier pinžaka pravilny? Hid dla mužčyn

Vydańnie The Wall Street Journal raić, na što źviarnuć uvahu.

1. Plečy — asnova ŭsiaho

Kali vy kuplajecie hatovy kaścium, najpierš źviarnicie ŭvahu na plečy: švo pavinna zakančvacca amal dakładna na krai vašaha plača. Dapuskajecca adchileńnie ŭ miežach paŭsantymietra — santymietra, kali vy chočacie bolš rassłableny siłuet.

Źviarnicie ŭvahu i na kaŭnier. Pamiž kaŭniarom kašuli i pinžaka nie pavinna być zazoru. Taksama drenna, kali tkanina ŭtvaraje składki zzadu kala šyi. Pinžak pavinien akuratna jaje ablahać.

2. Hrudzi

Druhi važny momant — abjom.

Pinžak pavinien zašpilvacca svabodna. Kali ŭ zašpilenym vyhladzie vy bačycie navat lohkaje «naciažeńnie» tkaniny, lepš nie kuplajcie.

Kali ž pamiž žyvatom i zašpilenym pinžakom svabodna źmiaščajucca jak minimum try palcy, jaho možna śmieła brać.

Jašče adzin sihnał, što pamier mały, — składki pad pachami pry zašpilenym pinžaku.

Kali madel krychu vielikavataja, jaje zvyčajna možna padahnać. Ale kali vy litaralna «patanajecie» ŭ pinžaku, lepš uziać mienšy pamier. Varta pamiatać ahulnaje praviła: ušyć adzieńnie praściej, čym pašyryć — lišniuju tkaninu niemahčyma «dadać».

3. Rukavy

Pa słovach śpiecyjalistaŭ, idealnaja daŭžynia rukava — pytańnie hustu, ale ŭ miežach razumnaha.

Kłasičny varyjant: rukaŭ zakančvajecca na miažy pamiž kiściu i zapiaściem.

Niekatoryja addajuć pieravahu krychu daŭžejšamu rukavu, kab pry zhinańni ruki jon nie padsoŭvaŭsia zanadta vysoka. Inšyja, naadvarot, vybirajuć karaciejšy, kab padkreślić hadzińnik ci branzalet.

Padkaracić rukavo zvyčajna nieskładana i adnosna niadoraha. Časam jaho možna i trochi padoŭžyć — kali ŭnutry manžety jość zapas tkaniny. Ale varta pravieryć, ci źjaŭlajucca prarezy dla huzikaŭ na rukavie funkcyjanalnymi. Kali jany dekaratyŭnyja, padhaniać praściej. Kali funkcyjanalnyja — rabota budzie bolš składanaj.

I važnaja detal: z-pad rukava pinžaka pavinna vyhladać manžeta kašuli. Kłasičnaja norma — kala 0,5—1 santymietra. Možna krychu bolš, ale nie nastolki, kab była vidać usia manžeta.

Pavialičyć

4. Daŭžynia pinžaka

Daŭžynia taksama zaležyć ad stylu, ale isnuje prosty aryjencir. Kali ruki apuščanyja ŭzdoŭž cieła, nižni kraj pinžaka pavinien znachodzicca prykładna pamiž pieršym i druhim sustavami vialikaha palca. Heta zabiaśpiečvaje zbałansavanyja praporcyi i nie skaračaje vizualna rostu.

5. Składka na štanach la abutku

Akramia niepasredna pinžaka varta źviarnuć uvahu na druhi elemient kaściuma — štany. Tut važny vyhlad miesca sudakranańnia kałašyny i abutku.

Kali tkanina ledź dakranajecca da vierchniaj častki tufla i ŭtvaraje nievialikuju składku, heta ličycca najbolš univiersalnym i biasprojhryšnym varyjantam.

Možna vybrać i bolš doŭhija štany, jakija daduć bolš vyraznuju składku, asabliva kali kroj šyrejšy. Heta stvaraje bolš tradycyjny, kłasičny siłuet. Kali ž vy nosicie boty, dadatkovaja daŭžynia daść «nievialiki zapas», kab kraj kałašyny akuratna lažaŭ na nasku abutku.

Śpiecyjalisty padkreślivajuć: mienavita ŭvaha da detalaŭ dazvalaje nie prosta nadzieć kaścium, a vyhladać u im biezdakorna.

• 1
• 0
• 2
• 0
• 0
• 0
• 0
• 0