Da Dnia rodnaj movy «Łuč» vypuściŭ limitavanuju kalekcyju hadzińnikaŭ
Sieryja stvorana ŭ honar «dźviuch jaskravych postaciaŭ biełaruskaj kultury» — Maksima Bahdanoviča i Ałaizy Paškievič (Ciotki). Kalekcyja stvoranaja pry ŭdziele Litaraturnaha muzieju Maksima Bahdanoviča.
«Heta kalekcyja pra movu, kulturu i sučasnaje bačańnie biełaruskaj litaraturnaj tradycyi. Hadzińniki stvoranyja jak stylny aksiesuar z hłybokim kulturnym napaŭnieńniem, što zaŭsiody budzie aktualny. <…>. Hadzińniki z hłybokim sensam, dzie kožnaja madel nahadvaje pra siłu biełaruskaha słova», — havorycca na sajcie «Łuča».
Hadzińniki vyjšli ŭ dźviuch madelach — mužčynskaj i žanočaj.
«Dva pohlady, dva hałasy, adzin rytm biełaruskaha narodu», — zaznačaje brend.
Maksima Bahdanoviča vytvorcy hadzińnikaŭ apisvajuć jak strymanuju i intelektualnuju asobu, jak i jahonyja vieršy, u jakich adčuvajecca dakładnaść formy, harmonija dumki i ruchu:
«Jaho tvorčaść — spałučeńnie jasnaści dumki i muzyčnaści słova, tradycyi i madernu. Jon zdoleŭ pakazać, što mova moža być nie tolki movaj «tutejšych», ale i movaj litaratury, mastactva, duchoŭnaj vyšyni».
Pra Ałaizu Paškievič (Ciotku) pišucca tak: «Śvietłaja, liryčnaja, poŭnaja paetyčnaj siły i piaščoty. Jaje słova — hołas spahady i miłasernaści, viery ŭ toje, što kultura — heta šlach da svabody. Ciotka adkryła novaje vymiareńnie biełaruskaj litaratury — žanočaje, hramadzianskaje, aduchoŭlenaje. Jaje tvory hučali jak manifiest viery ŭ budučyniu biełaruskaha narodu».
Kožny hadzińnik kamplektujecca dvuma ramieńčykami, jakija «dazvalajuć źmianiać charaktar aksiesuara ŭ zaležnaści ad nastroju»:
— śvietły z vyšyŭkaj, što adsyłaje da tradycyjnaha dekaratyŭnaha mastactva.
— ciomny ź ciśnieńniem — bolš strymany i ŭniviersalny.
Korpus hadzińnika zrobleny ź nieržaviejnaj stali. Cyfierbłat pakryty sapfiravym škłom.
Sieryja abmiežavanaja — 400 asobnikaŭ (pa 200 kožnaj madeli).
Košt — 175,66 jeŭra.
Ciapier čytajuć
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary