U stalicy Ukrainy, mnohija rajony jakoj praz rasijskija abstreły pazbaŭleny elektryčnaści i ciapła, pačało pracu novaje miesca dla dapamohi — punkt niazłomnaści, adkryty biełarusami.
Punkt niazłomnaści — heta abstalavanaje miesca, dzie kožny moža abahrecca, padzaradzić hadžety, atrymać inšuju padtrymku ad vałancioraŭ.
Pra adkryćcio punkta paviedamiła Alena Žarkievič, pradstaŭnica vałanciorskaha centra «Sustreča». Jana padziakavała ŭsim biełarusam, jakija dapamahli realizavać hetuju inicyjatyvu, materyjalna ci asabistym udziełam. Vałanciorka adznačyła vysokuju stupień salidarnaści dyjaspary, padkreśliŭšy, što navat padtrymka dumkami i słovam maje vialikaje značeńnie ŭ ciapierašnich umovach.
«Biełarusy, vy krutyja. Sapraŭdy. Ja vielmi dobra razumieju, što nie ŭsie mohuć pryjechać fizična. Ale ja baču i adčuvaju, kolki ludziej nas padtrymała — słovam, spravaj, finansami i navat prosta dumkami. I heta maje vialikaje značeńnie.
Siońnia, ustaloŭvajučy hety namiot, ja, jak i mnohija inšyja vałanciory, pačuła šmat ciopłych słoŭ u bok biełarusaŭ. Słoŭ padtrymki i ŭdziačnaści — za tych, chto vajuje, za tych, chto zahinuŭ, za tych, chto siońnia siadzić i chto ŭžo adsiadzieŭ za baraćbu z režymam, za niezaležnaść Biełarusi.
Emocyj tak šmat, što apisać heta vielmi ciažka. Tamu prosta — dziakuj. I kali ŭ vas jość mahčymaść i žadańnie dałučycca — dałučajciesia. Heta sapraŭdy vialikaja i važnaja sprava.
Biełarusy Vašynhtona, Kanady, Polščy, Litvy, Niamieččyny…
Ja nie mahu pieraličyć usich, bo nas šmat. Prostyja ludzi, sa svaimi spravami, prablemami i ciažkaściami — vy prosta ŭziali i dałučylisia. Vy nievierahodnyja. Dziakuj vam.
Asobnaje dziakuj tym, chto zaraz u Biełarusi. Za vašyja ciopłyja słovy padtrymki. Vaš udzieł — samy darahi», — napisała jana.
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary